BBC xəbər verir ki, İsrail ordusunun (IDF) bəyanatında bildirilir ki, bir müddət əvvəl İsrail Hərbi Hava Qüvvələri İranın nüvə silahı layihəsi ilə bağlı Tehranda bir sıra hədəflərə irimiqyaslı zərbələr endirməsini başa çatdırıb.
Hədəflər arasında İran Müdafiə Nazirliyinin qərargahı, SPND nüvə layihəsinin qərargahı və "İran rejiminin nüvə silahı əldə etmək səylərinə töhfə verən və İran rejiminin nüvə arxivini gizlətdiyi yerlər" əlavə hədəflər olub.
Bundan əvvəl İranın Tasnim agentliyi İsrailin hücumu nəticəsində İran Müdafiə Nazirliyinin inzibati binalarından birinə cüzi ziyan dəydiyini bildirib. Həmçinin onların məlumatlarına görə, Müdafiə Nazirliyinin Müdafiə Tədqiqatları və İnnovasiyaları Təşkilatı (SPND) zərər çəkib.
İyunun 15-nə keçən gecə İranın ballistik raketlər və pilotsuz uçan aparatlardan istifadə etməklə İsrailə qarşı kütləvi birləşmiş hücuma keçdiyi bildirilir. Fars agentliyi xəbər verir ki, onun əsas enerji obyektləri İranın İsrail ərazisinə raket hücumunun hədəfinə çevrilib.
Xatırladırıq ki, cümə günü, iyunun 13-nə keçən gecə İsrail İran ərazisinə irimiqyaslı zərbələr endirib. Buna cavab olaraq Tehran İsrailə doğru yüzdən çox pilotsuz uçan aparat atıb. İran Natanzdakı nüvə obyektinə dəyən ziyanı təsdiqləyib, lakin radiasiya sızmasını təkzib edib.
Bundan əvvəl İranın BMT-dəki nümayəndəsi İsrailin hava hücumları nəticəsində 78 nəfərin öldüyünü açıqlamışdı. İranda 320-dən çox insan yaralanıb. İran yüksək hərbi komandanlığın və aparıcı alimlərin İsrailin zərbələri nəticəsində həlak olduğunu təsdiqləyib.
Bundan əlavə, İran İsrailin hücumlarından sonra Hörmüz boğazını bağlamaq imkanını nəzərdən keçirir. Bu barədə İran parlamentinin milli təhlükəsizlik və xarici siyasət komitəsinin üzvü İsmail Kosari məlumat verib.
İran və ABŞ arasında danışıqlarda vasitəçi qismində çıxış edən Omanın xarici işlər naziri Bədr Əl-Busaidi bazar günü Maskatda keçirilməsi nəzərdə tutulan raundun “indi baş tutmayacağını” təsdiqləyib.
İran prezidenti Makrona deyib ki, İsrailin zərbələri dayandırılmayana qədər ABŞ ilə danışıqlar aparılmayacaq.
