Son günlər sosial media üzərindən yayılan və bəzi müstəqil mənbələrə istinadən təqdim olunan məlumatlarda İran və Pakistan sərhədində təhlükəli hərəkətlilik müşahidə olunduğu iddia edilir.
Musavat.com xəbər verir ki, Xüsusilə də, Pakistan və İran ərazilərində müstəqil “Bəluc dövləti” qurmaq uğrunda fəaliyyət göstərən separatçı qruplar sensasion açıqlamalarla çıxış edərək, sərhəddən keçən tankerlər və konteynerlərin içində raketlər və hərbi texnika daşıdığını bildiriblər.
İddialara görə, Pakistanın cənub-qərbində yerləşən Bəlucistan əyalətindən İranın Sistan-Bəlucistan bölgəsinə doğru hərəkət edən karvanlar qeydə alınıb. Bu karvanların, əsasən, ağır tonnajlı yük avtomobilləri və yanacaq tankerlərindən ibarət olduğu bildirilir. Bəluc separatçıları, konkret olaraq bu karvanların İran tərəfinə rəsmi və ya qeyri-rəsmi dəstək məqsədilə hərbi sursat və raket daşıdığını irəli sürüblər.
Onların əsas arqumenti isə son günlərdə İsrailin İrana qarşı həyata keçirdiyi hücumların intensivliyi fonunda Pakistanın həm siyasi, həm də texniki cəhətdən Tehranı dəstəklədiyi ehtimalıdır. Separatçı qruplar bildirirlər ki, Pakistan yalnız müsəlman ölkələrini İsraillə münasibətləri kəsməyə çağırmaqla kifayətlənmir, eyni zamanda İran rejiminə maddi-logistik yardım göstərmək niyyətindədir.
Lakin məsələni obyektiv müstəvidə təhlil edərkən, iddiaların reallıqla nə dərəcədə üst-üstə düşdüyünü sual altına almaq qaçılmazdır.
İlk olaraq qeyd edilməlidir ki, Pakistan və İran sərhədi uzun illərdir ki, qaçaqmalçılıq marşrutu kimi tanınır. Bu marşrut vasitəsilə, xüsusilə İran yanacağı, gündəlik olaraq Pakistan ərazisinə daşınır. Beynəlxalq agentliklərin məlumatına görə, bu ticarət əsasən iqtisadi xarakterlidir, və burada hərbi yük daşıma izinə rast gəlinməyib.
Bundan əlavə, İran və Pakistan arasında hərbi-siyasi münasibətlər 2024-cü ilin əvvəlində ciddi gərginliklərdən sonra stabilləşməyə başlamışdı. Hər iki ölkə arasında diplomatik kanallar vasitəsilə münasibətlərin normallaşdırılması istiqamətində addımlar atılıb. Bu fonda Pakistan tərəfindən rəsmi şəkildə İranı silah və raketlərlə təchiz etməsi, ən azı, açıq şəkildə qeydə alınmış faktlarla təsdiqlənmir.
Bununla belə, qeyd edilməlidir ki, həm Pakistanın Bəlucistan əyalətində, həm də İranın Sistan-Bəlucistan bölgəsində separatçı hərəkatlar, o cümlədən Balochistan Liberation Army (BLA) və digər silahlı təşkilatlar uzun illərdir ki, orqanizasiya olunmuş formada fəaliyyət göstərir. Bu qruplar, zaman-zaman regionda dövlət orqanlarına, sərhəd postlarına və təhlükəsizlik qüvvələrinə qarşı hücumlar təşkil edib, bölgədə sabitliyə ciddi təhlükə yaradıb.
Bu baxımdan, separatçı qrupların iddialarının həm təbliğat məqsədli, həm də geopolitik təzyiq vasitəsi kimi istifadə olunması ehtimalı istisna edilmir. Həmin qrupların İran və Pakistan arasındakı geosiyasi əlaqələri sabotaj etmək üçün bu cür iddialarla çıxış etməsi mümkündür.
Bütün təqdim olunan dəlil və müşahidələrə əsasən demək olar ki, Pakistanın İranı silah və raketlərlə təchiz etdiyi barədə separatçı iddialar hələlik rəsmi mənbələrlə təsdiqlənmir.
Musavat.com
