İyunun 14-də məktəblərdə keçirilən “Son zəng” tədbirləri bu il də müzakirəsiz ötüşməyib. Hər il xəbərdarlıq edilməsinə baxmayaraq, bu dəfə də on birinci sinif şagirdləri arasında məktəbli köynəyinə kriminal aləmə məxsus jarqonlar, loqolar yazanlar, cinayət aləminə həsr edilən mahnıları xorla oxuyaraq rəqs edənlər az olmayıb. Məktəblərdən yayılan görüntülər sosial şəbəkələrdə ciddi tənqid və etirazla qarşılanıb.
Milli Məclisin Elm və təhsil komitəsinin üzvü Ceyhun Məmmədov Pravda.az-a açıqlamasında deyib ki, cəmiyyətdə dəyərlərin ciddi transformasiyası ilə üz-üzəyik.
“Bu gün cəmiyyətdə çox ciddi proseslər gedir. Təəssüflə qeyd etməliyik ki, gənclərin bir hissəsi kriminal əməllərə, kriminal aləmə meyil edir. Əfsus ki, bir sıra hallarda “Son zəng” tədbirlərinin milli-mənəvi dəyərlərimizə uyğun keçirilmədiyini müşahidə edirik. Dəfələrlə rəsmi qurumların xəbərdarlıq etmələrinə baxmayaraq, “Son zəng”in mahiyyəti təhrif olunur, ruhuna uyğun olmayan addımlar atılır. Bu cür köynəklərin geyinilməsi, üzərinə belə şüarlar yazılması gənclərin tərbiyəsinin hansı formada və səviyyədə olduğunu göstərir. Hər zaman deyirik ki, məktəbin işi yalnız təhsil vermək deyil, həm də tərbiyə verməkdir. Məktəblərimizdə tərbiyə işini gücləndirməliyik. Məktəblərdə təlimlə yanaşı tərbiyə işi də ən yüksək səviyyədə qurulmalıdır. Valideynlərimiz də bu məsələyə həssas yanaşmalıdırlar. Hər bir şəxsin formalaşmasında bir neçə amil rol oynayır. Bu amillərdən biri də məktəb və ailələrdir. Təəssüf ki, əksər ailələrimiz bu rolu oynaya bilmir. Nəticədə isə belə halların atmasına gətirib çıxarır. Çalışmalıyıq ki, bu cür hallar kütləviləşməsin. Məktəblərdə mütləq şəkildə şəxsiyyətin formalaşmasına, tərbiyə işinin güclənməsinə qarşı daha diqqətli, həssas olmalıyıq. Gənclər arasında davamlı təbliğat, maarifləndirmə aparmalıyıq ki, onlar düzgün yolda olsunlar, yanlış yola, yanlış istiqamətə yönəlməsinlər. Onların yanlış addımlar atmaları gələcəkdə bizə ciddi problemlər yaradacaq”, — deputat çağırış edib.
Aytəkin Qardaşova
