Finss.az - ABŞ Ticarət Nazirliyi son həftələrdə yarımkeçirici sənayesi məhsullarının Çinə ixracına tətbiq olunan məhdudiyyətləri sərtləşdirmə variantını araşdırıb.
Bu barədə The Wall Street Journal məlumatlı mənbələrə istinadən xəbər verir.
Məlumata görə, ABŞ tərəfi yalnız qabaqcıl çiplərin deyil, həmçinin standart çip istehsalı üçün istifadə olunan avadanlıqların Çinə ixracını məhdudlaşdırmağı da müzakirə edib. Bu qərar həyata keçirilərsə, smartfon və avtomobil sənayesində istifadə olunan çip tədarük zəncirlərində ciddi pozuntular yarana bilər. Eyni zamanda, Applied Materials, Lam Research və KLA Corp. kimi aparıcı avadanlıq istehsalçılarının milyardlarla dollarlıq gəlirləri risk altına düşə bilər.
The Wall Street Journal-ın məlumatına görə, bu məhdudiyyətlər ticarət danışıqlarında gərginlik yaranacağı halda tətbiq oluna biləcək alternativ tədbir kimi nəzərdən keçirilirdi. Lakin hazırda Ağ Ev rəsmilərinin sözlərinə görə, belə sərt məhdudiyyətlər aktiv şəkildə müzakirə olunmur.
Yarımkeçiricilər dünya iqtisadiyyatı üçün strateji əhəmiyyət kəsb edən komponentlərdir və onların tədarükündə yaranan hər hansı bir məhdudiyyət qlobal texnoloji və avtomobil sənayesinə ciddi təsir göstərə bilər.
