Kəmalə Aşumova,
“Ümidli Gələcək” İctimai Birliyi
CBC TV kanalında bu günlərdə efirə gedən “Dayanıqlılıq və İnkişaf” verilişi əhalinin maliyyə savadlılığının formalaşdırılması kimi son dərəcə vacib və aktual bir mövzuya toxundu. Ölkənin aparıcı investisiya şirkətlərindən birinin baş direktorunun verilişdə iştirakı bu məsələyə ictimai maraq və diqqəti daha da artırdı. Çoxdan bəri sistemli və sahələrarası yanaşma tələb edən bu məsələ verilişdə “Dayanıqlı kapital: bu gün investisiyalar necə təsir edir?” başlığı altında müzakirə olundu. Korporativ təşəbbüslər çərçivəsində keçirilən təlimlər və ümumiyyətlə, maliyyə davranışının inkişaf etdirilməsinin əhəmiyyəti vurğulandı.
Şübhəsiz, bu kimi təşəbbüslər yüksək qiymətə layiqdir. Lakin önəmli bir sual yaranır: yalnız bu təşəbbüslər cəmiyyətdə dayanıqlı dəyişikliklərə nail olmaq üçün kifayət edirmi?
Beynəlxalq proqram çərçivəsində uşaqların və gənclərin maliyyə və sosial təhsilinə yönəlmiş uzunmüddətli layihəni həyata keçirmiş “Ümidli Gələcək” İctimai Birliyi olaraq əminliklə deyə bilərik ki, maliyyə savadlılığı üzrə fəaliyyət erkən yaşlardan başlamalı və ən geniş auditoriyanı əhatə etməlidir. Çünki məhz uşaqlıq dövründə pula, əməyə, istehlaka və qənaətə münasibət, əsas davranış modelləri və həyat prinsipləri formalaşır.
2009-cu ildən bəri ölkə miqyasında uğurla həyata keçirdiyimiz sosial və maliyyə savadlılığı proqramı öz yüksək effektivliyini sübut edib: bu təhsildən keçmiş məktəblilər maliyyə resurslarına qarşı düşünülmüş münasibət, planlama bacarığı, sosial fəallıq və təşəbbüskarlıq nümayiş etdirirlər. Bütün bunlar onların gələcəkdə iqtisadi müstəqilliyinə və sosial risklərə qarşı dayanıqlılığına birbaşa təsir edir.
Lakin hamımıza məlumdur ki, ən yaxşı nəticələr birgə əməkdaşlıqla əldə olunur. Elə isə, nə üçün biznes bu sahəyə investisiya yatırmır? Maliyyə savadlılığı təkcə təhsil fəaliyyəti deyil, həm də məsuliyyətli istehlak, investisiya fəallığı və ümumi rifah səviyyəsinin artımını dəstəkləyən sağlam iqtisadi mühitin formalaşma elementidir. Dayanıqlı inkişaf yalnız ekologiya və texnologiya ilə deyil, həm də öz resurslarını idarə etməyi bacaran məsuliyyətli vətəndaşlarla bağlıdır.
Maliyyə və investisiya sektoru üçün maliyyə savadlılığının təşviqində iştirak uzunmüddətli perspektivdə daha savadlı müştərilər hesabına bazarın möhkəmlənməsinə xidmət edir, cəmiyyətin maliyyə institutlarına inamını artırır, korporativ sosial məsuliyyət prinsiplərinə cavab verir, şirkətlərin ESG strategiyasının bir hissəsinə çevrilə bilər və dövlət və beynəlxalq tərəfdaşların gözündə müsbət imic formalaşdırır.
Biz “Ümidli Gələcək” olaraq maliyyə şirkətləri, investisiya strukturları və ümumilikdə korporativ sektorla tərəfdaşlığa açığıq. Təcrübəmiz, metodologiyamız və təhsil müəssisələrinə çıxış imkanlarımız ölçülə bilən sosial təsiri olan genişmiqyaslı və dayanıqlı proqramların həyata keçirilməsinə imkan verir.
CBC TV-də yayımlanan veriliş bir daha sübut etdi ki, maliyyə savadlılığı seçim deyil, dayanıqlı inkişafın zəruri şərtidir. Ancaq birlikdə biz bu gün yalnız danışılan, lakin hələ də həyata keçirilməyən məqsədlərə nail ola bilərik. Artıq hərəkətə keçməyin vaxtıdır – cəmiyyətin iqtisadi inkişafına dəstək vermək üçün. Elə deyilmi?
