Rusiyalı təbliğatçı Vladimir Solovyov yenidən Azərbaycana qarşı hörmətsizlik nümayiş etdirib. Bu dəfə o, Ermənistanda saxlanılan rusiyalı erməni iş adamı Samvel Karapetyanı müdafiə edərkən efirdə “Artsax” ifadəsindən istifadə edib. Bu ifadə isə erməni tərəfinin Azərbaycanın ərazi bütövlüyünə qarşı iddialarının rəmzinə çevrilib.
Bizim.Media xəbər verir ki, federal televiziyanın efirində Solovyov erməniləri “özlərini xatırlamağa” çağırıb, “böyük xristian ənənəsi”ndən danışıb və Ermənistanın “əlindən sonuncu şeyin də alındığını” iddia edib.
Verilişin kulminasiya nöqtəsində o, “erməniləri “artsax”ın aqibəti gözləyir” ifadəsini işlədib.
Bu çıxış, xüsusilə Azərbaycanda və regionda ciddi qıcıq doğurub. Yerli media və siyasi şərhçilər Solovyovun “rus dünyasının sərhədlərində dayanan coğrafiya təfəkkürü” ilə hərəkət etdiyini bildirirlər.
Məqalədə vurğulanır ki, “Artsaxın aqibəti” heç də bir hədə və ya qorxu deyil, əksinə, “başqasının torpağında qurulan tarixi illüziyaların” hansı nəticəyə gətirib çıxardığının aydın sübutudur.
Azərbaycan cəmiyyətində bu cür çıxışların Rusiya-Azərbaycan münasibətlərinə xələl gətirə biləcəyi, həmçinin tərəfsizlik və neytrallıq prinsipinə zidd olduğu qeyd edilir. Bu hadisə rəsmi səviyyədə olmasa da, ictimai və analitik dairələrdə Solovyovun növbəti provokasiyası kimi dəyərləndirilir.
Bizim.Media
