İranın Birləşmiş Millətlər Təşkilatının (BMT) Cenevrə ofisindəki daimi nümayəndəsi səfir Əli Bəhreyni jurnalistlərlə görüşüb və İsrailin İrana hücumları ilə başlayan münaqişələrlə bağlı dəyərləndirmələr edib.
İsrailin iyunun 13-dən İrana qarşı hücumlar təşkil etdiyini xatırladan Bəhreyni, “Bunlar İsrailin ölkəmizdəki mülki əhalini, qadınları, uşaqları, mülki infrastrukturu və hətta dinc nüvə obyektlərini hədəf alan təcavüzləridir. Bu hücumlar zamanı yüzlərlə günahsız insan, o cümlədən çoxlu uşaq və qadın həlak olub. Çünki təkcə İranda deyil, həm də ətrafımızda böyük sülh təhlükəsi var. Bölgə təhlükəli sızmalara məruz qalır”. Bəhreyni bir çox Qərb dövlətləri, eləcə də ABŞ tərəfindən İsrailin maliyyə, maddi-texniki və hərbi dəstəyini tənqid edib.
İsrailin səbəbsiz yerə İrana hücum etdiyini bildirən Bəhreyni, “İsrail bu hücumlar zamanı mülki insanları hədəfə alaraq, ayrı-seçkilik, mütənasiblik və hücumlar haqqında ictimaiyyəti məlumatlandırmaq prinsiplərini pozdu. İsrail beynəlxalq hüquq və insan haqlarının bütün normalarını pozdu. İran İsrailin hücumlarına cavab verməkdə qətiyyətlidir. Biz heç bir şübhə və tərəddüd göstərməyəcəyik, xalqımızın təhlükəsizliyini çox ciddi şəkildə müdafiə edəcəyik. Biz özümüzü müdafiə etməkdən başqa heç nəyə diqqət yetirə bilmərik”.
Bəhreyni ABŞ-ın İsrailin etdikləri işlərdə ortaq olduğuna diqqət çəkərək, “İsrail ABŞ olmadan heç bir şey deyil. İsrail nə edirsə, ABŞ-ın hərbi və kəşfiyyat dəstəyi ilə edir. ABŞ-ın hərəkətlərini izləyəcəyik. Əgər hər hansı bir məqamda ABŞ-ın İrana qarşı hücumlarda birbaşa iştirak etdiyi qənaətinə gəlsək, ABŞ-a cavab verməyə başlayacağıq” dedi.
Bu prosesdə BMT Təhlükəsizlik Şurası və digər beynəlxalq təşkilatların İsrailin törətdiyi cinayətlərin qarşısını ala bilmədiklərinə diqqət çəkən Bəhreyni beynəlxalq təşkilatların mövcudluq səbəbini itirdiyini bildirib.
Bəhreyni İranın nüvə proqramının dinc xarakter daşıdığını vurğulayıb.
***
Bəhreyni “ABŞ prezidenti Donald Trampın son gərginliklə bağlı açıqlamalarını müdaxilə olaraq görürsünüzmü?” sualına, “Bəli, biz ABŞ prezidenti başda olmaqla, ABŞ rəsmilərinin bəyanatlarını izləyirik. Biz bunları İrana qarşı çağırışlara qarşı məsuliyyətsiz münasibət kimi görürük və hesab edirik ki, ABŞ-ın İrana qarşı siyasəti son 40 ildə düşmənçilik xarakteri daşıyır. Bu yeni bir şey deyil. ABŞ-ın İrana qarşı təhdidləri yeni deyil. ABŞ-ın İrana qarşı düşmən münasibəti bəllidir. İran əvvəllər ABŞ-ın təkəbbürlü siyasətinə qarşı çıxan bir ölkə idi. Trampın bəyanatları tamamilə balanssızdır. Biz bu bəyanatları gözardı edə bilmərik”, – cavabını verib.
Bəhreyni İranın qırmızı cizgilərinin olduğunu və keçiləcəyi təqdirdə cavab verəcəklərini bildirib.
