"Əks halda biz bu rejimin terrorunu illərlə izləməli olardıq, nəhayət isə nüvə silahına sahib bir İrana şahidlik edəcəkdik..."
Mers İsrailin İran əməliyyatlarını "Qərb üçün faydalı çirkli iş" adlandırıb, Rusiya isə bu ifadəni faşizmin yenidən canlanması kimi qiymətləndirib
Almaniya kansleri Fridrix Mers İsrailin İrana qarşı hərbi əməliyyatlarını "digərlərinin əvəzindən görülən çirkli iş" kimi qiymətləndirərək, Tel-Əvivi cəsarətli addımlarına görə alqışlayıb.
Moderator.az xəbər verir ki, o, bu sözləri Kanadada keçirilən G7 sammiti çərçivəsində ZDF və ARD telekanallarına verdiyi müsahibələrdə səsləndirib. Məlumatı "dw.com" nəşri yayıb.
İsrailin "çirkli işi" və Mersin açıq dəstəyi
Mersin fikrincə, İsrail bu hücumlarla təkcə özünü deyil, həm də Qərb dünyasını mümkün terror və gələcəkdə nüvə təhdidindən qoruyur. "Bu, İsrailin hamımız üçün gördüyü çirkli işdir. Əks halda, biz bu rejimin terrorunu illərlə izləməli olardıq, nəhayət isə nüvə silahına sahib bir İrana şahidlik edəcəkdik", - o, bildirib.
Kansler İran rejimini terrorçu adlandıraraq, onun "HƏMAS və "Hizbullah" vasitəsilə bölgəyə ölüm və dağıntı yaydığını vurğulayıb. O həmçinin qeyd edib ki, 7 oktyabrda İsrailə qarşı həyata keçirilən hücumlar İranın dəstəyi olmadan mümkün olmazdı.
Mers İran rejiminin sonunu arzuladığını da açıq şəkildə bəyan edib və əlavə edib ki, əgər Tehran danışıqlara qayıtsa, hərbi müdaxiləyə ehtiyac qalmaz.
İsrail ordusu iyunun 13-də İranın nüvə obyektlərinə qarşı hücumlara başlayıb. Bu əməliyyatlar nəticəsində İran da raket və dronlarla cavab zərbələri endirib, azı 24 nəfər həyatını itirib, yüzlərlə insan yaralanıb. İranda sığınacaqların və xəbərdarlıq sistemlərinin olmaması isə itkiləri daha da artırıb.
Zaxarova Mersə sərt cavab verib
Almaniya kanslerinin bu çıxışı Rusiyada hiddətlə qarşılanıb. Rusiya Xarici İşlər Nazirliyinin sözçüsü Mariya Zaxarova, Mersin "İsrail hamımız üçün çirkli işi görür" ifadəsini "eşitdiyi ən dəhşətli söz" adlandırıb və onu qətiyyətlə qınayıb.
Zaxarova həmçinin Mersin ailə keçmişinə toxunaraq, onun babasının nasistlərlə əlaqəli olduğunu, atasının isə sovet ordusuna qarşı vuruşduğunu bildirib. Bu kontekstdə o, Rusiya Federasiyasının "antifaşist missiyasını" davam etdirdiyini iddia edib və İsrailin hazırkı rəhbərliyini dolayı yolla tənqid atəşinə tutub.
Mersin dediyi kimi, Avropa hazırda diplomatik yolla problemin həllinə töhfə verməyə hazırdır, lakin rəsmi Moskva bu çıxışları "faşizmin mədh olunması" kimi dəyərləndirərək, öz mövqeyini sərt şəkildə ortaya qoyub.
Almaniya və Rusiya arasında İran məsələsindəki bu qarşıdurma təkcə Yaxın Şərqdə deyil, Qərb-Rusiya münasibətlərində də gərginliyin yeni mərhələyə keçdiyini göstərir. Mersin dedikləri Avropanın getdikcə daha açıq şəkildə İsrail tərəfini tutduğunu göstərsə də, Rusiya bu mövqeləri öz tarixi irsinə qarşı təhqir hesab edir. İran isə bu geosiyasi qarşıdurmanın mərkəzində həm hücumlara məruz qalır, həm də buna cavab verir.
