ABŞ-ın İrana mümkün hücuma iki aviadaşıyıcı, onlarla döyüş təyyarəsi və bir neçə strateji bombardmançı təyyarəni cəlb edə bilər.
Publika.az xəbər verir ki, “The National Interest” (TNI) jurnalı ABŞ-ın İrana zərbə endirmək üçün nəhəng arsenalının olduğunu açıqlayıb.
Nəşrin köşə yazarı Piter Suçiu qeyd edib ki, iyunun 16-da ABŞ Hərbi Hava Qüvvələri ABŞ-ın İrana hava zərbələrini həyata keçirmək üçün istifadə oluna biləcək 30-a yaxın "KC-135 Stratotanker" və "KC-46A Pegasus" tanker təyyarələrini Avropaya yerləşdirdikdən bir neçə saat sonra prezident Donald Tramp Kanadada keçirilən G7 sammitini tərk edib. Eyni zamanda, ABŞ rəhbəri Tehranın 9,4 milyon sakinini şəhəri tərk etməyə çağırıb.
Suçiu qeyd edib ki, ertəsi gün, iyunun 17-də üç ABŞ rəsmisi "Reuters" agentliyinə bildirib ki, Amerikanın onlarla "F-16 Fighting Falcon", "F-22 Raptor" və "F-35 Lightning" II döyüş təyyarələri Yaxın Şərqə yerləşdirilib.
“Bu təyyarələrin hamısı yer hədəflərinə zərbə endirmək qabiliyyətinə malikdir, eyni zamanda İrana hücumlarda istifadə oluna biləcək bombardmançı təyyarələri də qoruya bilir”, - nəşr bildirib.
Həmçinin qeyd edilir ki, quru aerodromlarına əsaslanan qırıcılar ABŞ Hərbi Dəniz Qüvvələrinin iki aviadaşıyıcısı - "Carl Vinson" və "Nimitz" ilə təmsil olunan dəniz aviasiyasını tamamlaya bilər. Hər iki təyyarədaşıyan "F/A-18 Super Hornets" qırıcılarını daşıyır və "Carl Vinson" da beşinci nəsil göyərtəli "F-35C Lightning II" təyyarəsinə malikdir.
