İsrail "Oyanan Şir Əməliyyatı"nı başladıqdan sonra rusiyalı rəsmilər Yaxın Şərqdəki mövcud gərginliyi "narahatedici" və "təhlükəli" kimi qiymətləndiriblər.
Buna baxmayaraq, Rusiya mediası bu hadisələrin Moskva üçün mümkün müsbət nəticələrini vurğulamaqda gecikməyib.
Bunlar arasında aşağıdakılar ön plana çıxır:
Lakin İsrailin hərbi əməliyyatı uzandıqca, Moskvanın bu hadisələrdən ciddi ziyanlar görə biləcəyi faktı daha aydın görünür.
Bazar ertəsi günü Kommersant qəzetində yazan rusiyalı politoloq Andrey Kortunov bildirib ki, "toqquşmanın daha da gərginləşməsi Moskva üçün ciddi risklər və potensial xərclər yaradır."
Kortunova görə, "Reallıq budur ki, Rusiya beş ay əvvəl strateji tərəfdaşlıq sazişi imzaladığı bir ölkəyə qarşı İsrailin genişmiqyaslı hücumunun qarşısını ala bilmədi."
O əlavə edib: "Moskvanın İsraili qınayan siyasi açıqlamalardan kənara çıxmağa hazır olmadığı, İranı hərbi cəhətdən dəstəkləmək niyyətində olmadığı aydındır."
Vladimir Putin ilə İran Prezidenti Məsud Pezeşkianın bu ilin əvvəlində imzaladığı Rusiya-İran strateji tərəfdaşlıq sazişi hərbi ittifaq deyil.
Bu saziş Moskvanı Tehranı müdafiə etməyə məcbur etmir.
Lakin imzalandığı vaxt Rusiya bu sazişin əhəmiyyətini xüsusi olaraq vurğulamışdı.
Ria Novosti xəbər agentliyinə verdiyi müsahibədə Rusiya Xarici İşlər naziri Sergey Lavrov deyib ki, bu saziş "regional və qlobal səviyyədə sülh və təhlükəsizliyin təmin olunması üçün koordinasiyanın gücləndirilməsinə xüsusi əhəmiyyət verir və Moskva ilə Tehran arasında təhlükəsizlik və müdafiə sahələrində daha sıx əməkdaşlıq istəyini əks etdirir".
Lakin son altı ayda Moskva Yaxın Şərqdəki əsas müttəfiqlərindən birini – Bəşər Əsədi artıq itirib.
Suriya lideri dekabr ayında devrildikdən sonra ona Rusiyada sığınacaq verilib.
İranda rejim dəyişikliyi ehtimalı, yəni Moskvanın bölgədə daha bir strateji tərəfdaşını itirmə riski, Kreml üçün ciddi narahatlıq doğurur.
Çərşənbə axşamı Moskovskiy Komsomolets qəzetində Yaxın Şərqdəki vəziyyətə dair şərhdə qeyd olunurdu ki, "Hazırda qlobal siyasətdə real vaxtda böyük dəyişikliklər baş verir və bunlar ölkəmizdəki həyatı birbaşa və ya dolayısı ilə təsir altına alacaq".
Vladimir Putin həftənin böyük hissəsini Sankt-Peterburqda keçirəcək. Şəhər bu həftə illik Beynəlxalq İqtisadi Forumuna ev sahibliyi edir.
Bir vaxtlar "Rusiyanın Davosu" adlandırılan bu tədbir artıq bu ada çox da uyğun gəlmir.
Xüsusilə Rusiyanın Ukraynanı işğal etməsindən sonra, Qərbin aparıcı şirkət rəhbərləri bu tədbirdən uzaq dururlar.
Rusiya hakimiyyəti bu tədbiri çox güman ki, Ukraynada müharibə səbəbilə Rusiyanı təcrid etmək cəhdlərinin uğursuz olduğu mesajını vermək üçün istifadə edəcək.
Bu tədbir iqtisadi forum olsa da, geosiyasi məsələlər hər zaman yaxından izlənir.
