Ermənistan təhlükəsizlik qüvvələri arxiyepiskop Mikael Ajapakhyanı saxlayıblar.
Bizim.Media xəbər verir ki, bunu bütün ermənilərin katolikosu II Qaregin bildirib.
"Yepiskop indi vəkilimizlə birlikdə gedəcək, biz keşişlərin iclasının keçirildiyi iqamətgaha qayıdacayıq. Orada öz hərəkətlərimizi müzakirə edib qərar qəbul edəcəyik. Ədalətin təntənəsi üçün əlimizdən gələni edəcəyik", - II Qaregin bildirib.
Qeyd edək ki, bu gün Ermənistan Milli Təhlükəsizlik Xidmətinin (MTX) əməkdaşları Eçmiədzində bütün ermənilərin katolikosunun iqamətgahının yerləşdiyi əraziyə daxil olublar.
II Qareginin özü xüsusi təyinatlıların qarşısına çıxıb. Təhlükəsizlik qüvvələri kilsənin həyətində olan jurnalistləri çıxarıb.
Bundan əlavə, Eçmiədzində katolikosun iqamətgahına daxil olmaq istəyən din xadimləri ilə təhlükəsizlik qüvvələri arasında əlbəyaxa dava düşüb.
Xatırladaq ki, bir neçə gün əvvəl Ermənistan Baş naziri Nikol Paşinyana qarşı etirazlara rəhbərlik edən keşiş Baqrat Qalstanyan da saxlanılmışdı.
Bizim.Media
