Türkiyənin tanınmış aktyoru Şekip Taşpınar bu səhər dünyasını dəyişib. Paralel.az xəbər verir ki, məlumatı onun meneceri Temmuz Karikutal sosial şəbəkə hesabında paylaşıb:
“Menecerliyini etdiyim dəyərli aktyor Şekip Taşpınarı bu səhər saatlarında itirməyin dərin hüznünü yaşayıram. Çox şey paylaşmışdıq. Məkanın cənnət olsun, ağabəy...”
Qeyd edək ki, Şekip Taşpınar 2023-cü ildə alkoqol zəhərlənməsi səbəbilə uzun müddət müalicə almışdı.
SON PAYLAŞIMI — 9 MAY
Şekip Taşpınar son paylaşımını 9 may tarixində sosial media hesabında etmiş və öz fotosunun altına belə yazmışdı:
“O artıq təqaüddədir, sənətkarlıqdan deyil, təbii ki, min dəfə önündə baş əyirəm — DÖVLƏT TEATRI.”
MEHMET ŞEKİP TAŞPINAR KİMDİR?
Mehmet Şekip Taşpınar 10 fevral 1969-cu ildə Ankarada anadan olub. Hacettepe Universiteti Ankara Dövlət Konservatoriyasının məzunu idi. Sənət həyatına 1988-ci ildə Ankara Halk Oyuncuları Teatrında başlayıb. 1990-1994-cü illərdə Ankara Dövlət Konservatoriyasında təhsilini davam etdirib.
1995-1998-ci illərdə Ankara Dövlət Teatrında, 1999-cu ildən etibarən isə Adana Dövlət Teatrında fəaliyyət göstərib. 2000-2003-cü illər arasında Çukurova Universitetinin Dövlət Konservatoriyasında aktyorluq, diksiya və fonetika dərsləri verib. 1988-ci ildən başlayaraq TRT və digər televiziya kanallarında dublyaj səsləndirmələri edib.
O, 2009-cu ildə “Kurtlar Vadisi Pusu” serialında canlandırdığı Cevat Akarsu obrazı ilə populyarlıq qazanıb.
