Bakıda daşınmaz əmlak bazarının gəlirliliyi artır.
Bakıda kirayə qiymətləri yüksəlir : Qiymətə təsir edən amillər açıqlandı
FED.az xəbər verir ki, bu barədə Azərbaycan Beynəlxalq Bankının (ABB) “Bakı şəhəri üzrə daşınmaz əmlak bazarının təhlili” adlı hesabatında məlumat verilib.
Son dövrlərdə Bakı şəhərində daşınmaz əmlak bazarında gəlirlilik göstəriciləri artmaqdadır. Hesabatda qeyd olunur ki, 2022-ci ilin II yarısından etibarən mənzil bazarında kapital gəlirliliyi (RPI) icarə gəlirliliyindən yüksək olub. Yəni, alqı-satqıdan əldə edilən gəlir, icarədən gələn gəliri üstələyib.
Bununla yanaşı, 2021-ci ilin ikinci yarısından mənzilin ümumi gəlirlilik faizi artıq AİKZF ipoteka faizlərini keçmişdir. 2022-ci ilin ikinci rübündən başlayaraq isə manatla olan bank depozitlərinin faizlərini də üstələyib. Hazırda bu artım davam edir.
Bütün bu göstəricilər onu göstərir ki, Bakıda daşınmaz əmlaka sərmayə qoymaq bank depozitindən və digər maliyyə alətlərindən daha gəlirli hesab olunur.
2023-cü ilin II rübündən etibarən ölkədə inflyasiya səviyyəsində azalma müşahidə olunsa da, daşınmaz əmlak bazarında qiymətlər artmağa davam edib. 2024-cü ildə bu artım nisbətən zəifləsə də, əmlak qiymətləri hələ də inflyasiya indeksindən yuxarıdır.
Mənzil bazarındakı gəlirliliyin digər vacib göstəricisi kapitallaşma müddətidir – yəni mənzilə qoyulan pulun icarə gəliri vasitəsilə nə qədər müddətə geri qaytarılması. Bakı şəhəri üzrə bu göstərici 19,2 il təşkil edir.
Müqayisə üçün digər şəhərlərdə bu göstərici belədir:
-
Moskva – 26,8 il
-
İstanbul – 16,9 il
-
Tbilisi – 12,9 il
-
Tehran – 17,8 il
-
Yerevan – 17,5 il
-
Almatı – 12,6 il
-
Ankara – 12 il
-
Astana – 10,9 il
-
Daşkənd – 11,7 il
Yəni, bəzi şəhərlərlə müqayisədə Bakıda investisiyanın geri dönüşü bir qədər uzun çəksə də, əmlak bazarının davamlı artımı bu sərmayənin təhlükəsiz olduğunu göstərir.
Sövdələşmə payı – yəni, alqı-satqı zamanı ilkin təklif qiyməti ilə real satış qiyməti arasındakı fərq – mənzilin dəyərindən asılı olaraq dəyişir. ABB-nin təqdim etdiyi göstəricilərə əsasən:
-
200.000 manatdan ucuz olan mənzillərdə bu fərq 3–5% aralığında olur.
-
200.000 – 350.000 manat arası mənzillərdə bu göstərici 7%-dək yüksəlir.
-
350.000 – 500.000 manat aralığında olan mənzillərdə isə 10%-ə qədər sövdələşmə imkanı yaranır
Beləliklə, ABB-nin hesabatı göstərir ki, Bakı şəhərində daşınmaz əmlak bazarı stabil şəkildə inkişaf edir, gəlirlilik artır, bazar aktivliyi isə müxtəlif faktorlarla dəyişkən xarakter alır. Amma ümumi tendensiyalar göstərir ki, əmlaka yatırılan vəsait uzunmüddətli dövrdə özünü doğruldur.
