İstifadə müddəti keçmiş məhsullar, xarab olmuş qidalar, içərisindən yad cisim çıxan ərzaqlar... Təəssüf ki, belə problemlərlə bağlı şikayətlərin azalmaq əvəzinə artır.
Bakıvaxtı.az xəbər verir ki, belə şikayətlərdən biri də “Bolluq LTD MMC” şirkətinə məxsus uşaqlar üçün nəzərdə tutulmuş peçenye ilə bağlıdır. Belə ki, şikayətçi sosial şəbəkədə paylaşım edərək, peçenye paketinin içərisindən dəmir parçası çıxdığını iddia edib.
“Bu məhsul ‘Bolluq LTD MMC’-yə məxsus uşaqlar üçün peçenyalardı. Yaxşı ki, uşaq yeməmişdən əvvəl içindən çıxan bu dəmir parçasını gördük. Uşaqlara bu kimi məhsulları verəndə diqqətli olmaq lazımdır”, deyə vətəndaş yazıb.
Şikayətçinin sözlərinə görə, əgər uşaq bunu yesə sağ qalması qeyri-mümkündür:
"Çox məsuliyyətsizlik edirlər. Uşağı zülmlə saxla. Sonra da hansısa firmanın diqqətsizlik və məsuliyyətsizliyinin qurbanı olsun. Utanın. Heç olmasa öz övladlarınızı düşünün".
Bakıvaxtı.az vətəndaşın şikayəti ilə əlaqədar Azərbaycan Qida Təhlükəsizliyi Agentliyinə (AQTA) sorğu göndərib.
Mina Mikayılova
