“OpenAI” şirkəti “ChatGPT” çat-botunun artan populyarlığına vurğu edərək, onun gündə 2,5 milyarddan çox istifadəçi sorğusu emal etdiyini bildirib. Qeyd olunur ki, sorğuların təxminən üçdə bir hissəsi ABŞ-dəki istifadəçilərin payına düşür.
Sorğu sayının artmasına baxmayaraq, “ChatGPT” ildə 5 trilyondan çox sorğu emal edən “Google”dan hələ də geri qalır. 2024-cü ilin dekabrından 2025-ci ilin martına qədər “ChatGPT”nin həftəlik auditoriyası 300 milyondan 500 milyon nəfərə qədər artıb. Analitiklər qeyd edirlər ki, çat-bot getdikcə klassik axtarış sistemlərinə alternativ kimi istifadə olunmağa başlayır.
“OpenAI” yaxın həftələrdə öz süni intellektlə işləyən brauzerini işə salmağı planlaşdırır ki, bu da “Google” ilə rəqabəti artıra bilər. Şirkət həmçinin istifadəçi adından avtomatik olaraq tapşırıqları yerinə yetirə bilən “ChatGPT Agent” adlı aləti təqdim edib.
