BAKI, 3 avqust. TELEQRAF
Əgər Çin Donald Trampın Ukrayna müharibəsində Rusiyaya qarşı iqtisadi təzyiq siyasətindən geri çəkilməyəcəyinə inanarsa və eyni zamanda Vaşinqton Kiyevə hərbi dəstəyi artırarsa, bu, Moskva üzərində təzyiqlərdə dönüş nöqtəsi ola bilər.
Teleqraf xəbər verir ki, bu barədə "The Washington Post" (WP) yazır.
Nəşrin qənaətinə görə, Rusiya Təhlükəsizlik Şurasının sədr müavini Dmitri Medvedevin nüvə təhdidlərinə cavab olaraq Trampın iki nüvə sualtı qayığını hərəkətə gətirməsi ABŞ-nin sərt mövqeyinin göstəricisidir. Bu, Trampın Kremlin qarşısında “yumşaq” siyasət apardığına dair əvvəlki tənqidlərlə kəskin ziddiyyət təşkil edir.
WP yazır ki, Tramp Rusiyadan neft almağa davam edən Hindistana qarşı idxal rüsumları tətbiq etməklə əvvəlki prezidentlərin (Barak Obama və Co Baydenin) çəkinərək atmadığı addımı atıb. Bu mexanizmin indi Çinə qarşı da işə salınması mümkündür.
Qəzetin məlumatına görə, ABŞ-nin Hindistana tətbiq etdiyi tariflər nəticəsində bu ölkənin dövlət neft emalı şirkətləri Rusiya nefti alışını müvəqqəti dayandırıblar. WP bunu "ikincili sanksiyaların" effektivliyinə nümunə kimi təqdim edir. Bu cür tədbirlər vaxtilə həm İranı nüvə danışıqlarına oturtmağa, həm də Suriya prezidenti Bəşər Əsədin mövqeyini zəiflətməyə kömək edib.
Buna baxmayaraq, Çin məsələsində Tramp daha ehtiyatlı davranır. Belə ki, ABŞ prezidenti Çinin lideri Si Cinpinlə geniş ticarət razılaşması əldə etməyə çalışır. Bu səbəbdən o, Tayvan liderinin ABŞ-a səfərinə qadağa qoyub və Çinlə münasibətləri kəskinləşdirməməyə çalışır.
Amma ABŞ-nin maliyyə naziri Skott Bessentin sözlərinə görə, Stokholmda keçirilən son danışıqlarda Pekinə açıq şəkildə bildirilib ki, Rusiya nefti alınmağa davam edərsə, Çin mallarına 100%-ə qədər gömrük rüsumları tətbiq oluna bilər.
Hazırda Çin tərəfi Trampın tələblərinə boyun əyməyə meyilli görünmür. Lakin Pekin onun qətiyyətinə inanarsa vəziyyət dəyişə bilər
