2013-cü ildə ilk qatarın xəttə buraxılmasından bəri Çin–Avropa dəmir yolu marşrutunun Orta Dəhlizi ilə 20 000-dən çox qatar keçib.
Hafta.az Trend-ə istinadla xəbər verir ki, 20 mininci qatar Şimali Çində, Daxili Monqolustan Muxtar Rayonunda yerləşən Erenhot dəmir yolu limanından yola düşüb. Qatar 55 konteyner daşıyır.
Orta Dəhliz 10 min qatardan 20 min qatara qədər olan mərhələni cəmi üç ilə qət edib: 10 minlik hədd 2022-ci ildə aşılmışdı. Hazırda ekspress 73 marşrut üzrə fəaliyyət göstərir, Almaniya və Polşa da daxil olmaqla 10-dan çox ölkədə 70-dən artıq logistika mərkəzini birləşdirir və Çinin 24 vilayətində 60-dan çox şəhəri əhatə edir.
“Orta Dəhliz artıq sadəcə bir ideya deyil. O, addım-addım gerçəyə çevrilir”, – deyə iyulun sonunda Orta Dəhlizlə Çindən Türkiyəyə iki yük qatarının yola salınmasını şərh edərkən türk logistika şirkəti “Pasifik Eurasia”nın baş direktoru Fatih Erdoğan bildirib.
Onun sözlərinə görə, ənənəvi dəniz marşrutları ilə müqayisədə, Orta Dəhliz təkcə daha qısa yol təqdim etmir, həm də idarəetmə imkanlarını artırır.
“Bu qatarlar təkcə konteyner daşımır, həm də baxış, etimad, strategiya və ortaq gələcək daşıyır”, – o vurğulayıb.
Qeyd edək ki, Orta Dəhliz regionun bir sıra ölkələrindən keçən, Asiya ilə Avropanı birləşdirən nəqliyyat və ticarət marşrutudur. Bu, ənənəvi Şimal və Cənub dəhlizlərinə alternativdir.
Marşrut Çindən başlayır və Qazaxıstan, Özbəkistan və Türkmənistan kimi Mərkəzi Asiya ölkələrindən keçərək, Xəzər dənizi, Azərbaycan, Gürcüstan və Türkiyədən keçərək Avropaya çatır. Orta Dəhliz Asiyanın şərq bölgələrini, o cümlədən, Çini Avropa ilə birləşdirən, daha uzun dəniz yollarından yan keçməklə quru yolu təklif edir.
