Hindistan Hərbi Hava Qüvvələri (HHQ) uzun müddətdir gözlənilən Çoxfunksiyalı Döyüş Təyyarələri (MRFA) proqramı çərçivəsində əlavə “Rafale” qırıcılarının alınması üçün Fransa ilə hökumətlərarası razılaşma əldə etmək istiqamətində fəal addımlar atır.
“Poliqon” “The Economic Times” nəşrinə istinadən xəbər verir ki, layihəyə əsasən, 114 ədəd qırıcının alınması nəzərdə tutulur və onların əksəriyyətinin xarici tərəfdaşlarla əməkdaşlıq şəraitində ölkə daxilində istehsalı planlaşdırılır.
Nəşrin məlumatına görə, Hindistan HHQ MRFA proqramı üzrə ilkin “Zərurətin Qəbul Edilməsi” (AoN) üçün sənədi müdafiə naziri Rajnat Sinqin sədrlik etdiyi Müdafiə Alqı-Satqı Şurasına (DAC) növbəti bir-iki ay ərzində təqdim etməyi planlaşdırır.
Qeyd edilib ki, bu layihə ilə bağlı yekun qərarı Müdafiə Alqı-Satqı Şurası verəcək, ancaq Hindistan HHQ-nin döyüş eskadronlarının sayının azalmasına qarşı mübarizə aparmaq üçün daha çox “Rafale”lərin alınması zəruridir.
