“Hesab edirəm ki, Gürcüstan tərəfinin narahatçılıqları əsassızdır və buna heç bir əsas yoxdur. Zəngəzur dəhlizinin açılması Gürcüstan üçün hər hansı bir təhlükə yaratmır. Bəzi təhlillərdə və açıqlamalarda deyilir ki, dəhlizin açılması Gürcüstanın nəqliyyat və kommunikasiya imkanlarını zəiflədə bilər, lakin mən bu narahatlıqları tamamilə yanlış hesab edirəm. Gürcüstan da gələcəkdə Zəngəzur dəhlizindən lazım gəldikcə, yəni qoşularaq istifadə edə bilər. Bunu mütəxəssislər müəyyən edə bilərlər. Azərbaycan üçün isə Bakı–Tbilisi–Qars, Bakı–Tbilisi–Ceyhan, Bakı–Tbilisi–Ərzurum və digər nəqliyyat yolları əvvəlki kimi fəaliyyətini qoruyacaq”.
Bu fikirləri Aznews.az-a açıqlamasında Cross Media Təhlil Mərkəzinin analitiki, siyasi şərhçi Mübariz Göyüşlü deyib.
Qeyd edək ki, Zəngəzur dəhlizi Cənubi Qafqaz regionunda, xüsusilə Gürcüstan üçün geniş müzakirə mövzusuna çevrilib. Bəzi rəsmi şəxslər bildirirlər ki, Azərbaycan və Ermənistan arasında sülh əldə olunarsa, dəhlizin fəaliyyəti Gürcüstanın strateji mövqeyinə və iqtisadi maraqlarına təsir göstərə bilər. Lakin ekspertlər hesab edirlər ki, bu narahatlıqlar əsassızdır və sülh prosesi Zəngəzur dəhlizinin Gürcüstan üçün yeni iqtisadi və nəqliyyat imkanları yaratmasına şərait yaradacaq.
Siyasi şərhçi bildirib ki, istifadənin tempi əvvəlki qədər sürətli olmasa da, infrastrukturun əhəmiyyəti dəyişməyəcək və yollar aktiv şəkildə işləməyə davam edəcək.
“Azərbaycan Zəngəzur dəhlizini yalnız Azərbaycandan Naxçıvana gediş-gəliş üçün açılmasını tələb etmir, eyni zamanda bütün region və dünya ölkələri üçün nəqliyyat və ticarət əlaqələri üçün imkan yaratmağa çalışır. Bu narahatlıqları qabardan, açıqlama verən şəxslər isə Azərbaycan–Gürcüstan–Türkiyə üçtərəfli əməkdaşlığının dostluq münasibətlərinə zərər verə biləcək şəxslərdir”.
