BAKI, 14 avqust. TELEQRAF
ABŞ Prezidenti Donald Trampın administrasiyası ölkənin texnologiya nəhəngi “Intel”də pay almaq üçün danışıqlar aparır.
Teleqraf xəbər verir ki, bu barədə “Bloomberg” agentliyi mənbələrə istinadən məlumat yayıb.
Bildirilir ki, bu sözləşmə korporasiyanın ABŞ ərazisindəki istehsal müəssisələrini möhkəmləndirmək, o cümlədən Ohayo ştatında istehsal mərkəzinin tikilməsinə kömək etmək məqsədi daşıyır. Pay almaq təklifi avqustun 11-də Tramp ilə “Intel”in rəhbəri Lip-Bu Tan arasında Ağ Evdə baş tutmuş görüşdən sonra irəli sürülüb. Sözləşmənin şərtləri hələ razılaşdırılır. Razılıq əldə ediləcəyi təqdirdə, Lip-Bu Tan, böyük ehtimalla, korporasiyanın rəhbəri vəzifəsində qalacaq.
Şirkət hakimiyyətlə danışıqlar aparıldığı barədə məlumatı təsdiqləməyib.
"Tramp administrasiyası ilə əməkdaşlığı davam etdirməyi səbirsizliklə gözləyirik. Lakin biz şayiələri şərh etmək niyyətində deyilik", - “Intel”in bəyanatında deyilir.
