Bu yay İsveç polisi avtomobillərdə həddindən artıq yüksək səsli musiqiyə görə 550-dən çox şəxsə cərimə tətbiq edib.
Bizim.Media xəbər verir ki, pozuntuların sayına görə mütləq lider Berqslagen bölgəsidir - ölkədə bütün halların yarısı məhz orada qeydə alınıb.
2021-ci ildən İsveçdə ətrafdakıları narahat edən yüksək səsli musiqi də daxil olmaqla, “ədəbsiz davranış”a görə cərimələrin tətbiqinə icazə verən qanun mövcuddur. Cərimə min kron (104 ABŞ dolları) təşkil edir, lakin polis bunu çox aşağı hesab edir: qanunu pozan bir çox insan məbləği öz aralarında bölür.
Polisin sözlərinə görə, avtomobillərdə gəzərək yüksək səslə musiqi qulaq asmaq ənənəsi yerli mədəniyyətin bir hissəsinə çevrilib. Bu, xüsusilə yüzlərlə yüksək səs pərəstişkarını cəlb edən avtomobil tədbirləri və gəzintilər zamanı daha çox nəzərə çarpır.
Berqslagen polisi cəzaların sərtləşdirilməsində israr edir və gənclərin sakinləri narahat etmədən musiqi dinləyə biləcəkləri xüsusi meydançaların yaradılması imkanını nəzərdən keçirir.
Region ardıcıl olaraq dörd ildir cərimələrə görə “lider”dir. Hüquq-mühafizə orqanlarının əməkdaşları bunu təkcə problemin miqyası ilə deyil, həm də polisin səmərəli fəaliyyəti ilə izah edirlər: buraya gələnlər cərimədən yayına bilməyəcəklərini tez başa düşürlər.
Bizim.Media
