“Belə vacib oyunda komandama kömək edə bildiyim üçün çox sevincliyəm.
Amma istəmirəm ki, başqa şeylər düşünüm”.
Sportinfo.az xəbər verir ki, bu sözləri “Qarabağ”ın hücumçusu Musa Qurbanlı Çempionlar Liqasının pley-off mərhələsində Macarıstanda “Ferentsvaroş”a qalib gəldikləri görüş (3:1) haqqında danışarkən deyib.
Oyunda sonuncu qolun müəllifi olan futbolçu Bakıya qayıtdıqdan sonra hava limanında jurnalistlərin suallarını cavablandırıb.
O bildirib ki, qol vurmaq üçün həmişə çalışır: “İndiyə qədər də çox çalışmışam, sadəcə, səbrli olmaq lazım idi.
Bundan sonra da daha yaxşısını etməyə çalışacam. Allah nə vaxt istəsə, onda səni mükafatlandırır. Mənim üzərimə düşən sadəcə işləməkdir”.
