GlobalInfo portalından verilən məlumata görə, ain.az xəbər yayır.
Bu həftənin sonunda Azərbaycan və Rusiya arasında iqtisadi əməkdaşlıq məsələləri üzrə Hökumətlərarası Komissiyanın növbəti iclasının keçirilməsi gözlənilir. Bu barədə “Trend” agentliyinə etibarlı mənbələrdən məlumat daxil olub. Komissiyaya Rusiya baş nazirinin müavini Aleksey Overçuk və Azərbaycan baş nazirinin müavini Şahin Mustafayev həmsədrlik edirlər. Overçuk görüşün baş tutacağını təsdiqləyib.
Məlumata görə, rəsmi Bakı iclasa ciddi hazırlaşır. Xüsusilə son vaxtlar Rusiya mediasında Azərbaycan əleyhinə yayımlanan materiallarla bağlı ətraflı hesabat hazırlanıb və bu sənədin qarşı tərəfə – Rusiya nümayəndə heyətinə təqdim olunacağı bildirilir. Bu məqam iclasın təkcə iqtisadi deyil, eyni zamanda siyasi xarakter daşıya biləcəyini göstərir.
Rusiya–Azərbaycan münasibətlərində dönüş yaşanır?
Globalinfo.az-a danışan Prezident yanında İdarəçilik Akademiyasının müşaviri, Bakı Politoloqlar Klubunun sədri Zaur Məmmədov deyib ki, Azərbaycan–Rusiya münasibətləri bu gün ciddi çağırış qarşısındadır:
“Bəlli məsələdir ki, bu çağırışlar nədən qaynaqlanır. Təyyarədən sonra başlanan proses davam edir. Baxmayaraq ki, Azərbaycan geridə qoyduğumuz 30 il ərzində Rusiyaya qarşı heç vaxt ayrı-ayrı geosiyasi oyunçuların, qlobal güclərin yanında yer alıb onların məkrli planlarının bir parçası olmayıb. Aydındır, hər bir ölkənin öz maraqları var və rəsmi Bakı xarici siyasətində öz milli maraqlarını prioritet tutaraq, eyni zamanda qonşu dövlətlərin maraqlarını da nəzərə almaqda əməli addımlar atıb. Biz bunu müxtəlif illərdə görə bilərik. Fakt ondan ibarətdir ki, əgər biz MDB məkanındakı digər ölkələrə nəzər salsaq, görərik ki, Azərbaycan öz qonşularına qarşı daim rasional siyasət aparıb və Cənubi Qafqazda sülhün güclənməsi, inkişafı üçün əlindən gələni edib. Azərbaycan bəzi qonşu ölkələrdən fərqli olaraq geosiyasi risklər və mübarizə meydanına bölgəni çevirməyib. Bəlli həqiqətdir ki, bəzi qlobal təşkilatların və fondların bölgəyə daxil olmasına Azərbaycan icazə verməyib. Lakin bütün bunların qarşılığında son aylarda ölkəmizə olan münasibət məqbul deyil.
Zaur Məmmədov
Həmçinin oxuyun:
Rusiyadan Azərbaycana qarşı yeni təxribat – Bakı fövqəladə qərar verə bilər
Təyyarəmizə hücum zamanı rəsmi Bakı açıq və qəti mövqe nümayiş etdirdi. Əgər ortada cinayət varsa, onu araşdırmaq və müvafiq addımlar atmaq lazımdır. Cinayətin gizlədilməsi və lazımi hüquqi reaksiyanın verilməməsi çox kəskin şəkildə qarşılandı. Bununla belə, Rusiya tərəfdən adekvat addımların atılacağına dair ümidlər var”.
Ekspert deyib ki, komissiyaya Şahin Mustafayevin rəhbərlik edəcəyi və nümayəndə heyətinin Həştərxana səfər edəcəyi barədə də məlumat var:
“Təbii ki, Rusiya böyük qonşudur və bu ölkə ilə münasibətlər Azərbaycan üçün daim prioritet olub. Dövlət nəyi necə etmək lazım olduğunu yaxşı bilir.
Rusiya media orqanları onlara verilən əmr əsasında Azərbaycanla bağlı açıqlamalar yaydılar. Reallıq budur ki, bu cür fikirlər bir təsir mexanizmi kimi istifadə olunur və gələcəkdə də ediləcək. Bizdə milli və etnik münasibətlər çox yaxşı şəkildə qurulub. Etnik kartdan istifadə edən qüvvələr öz məqsədinə çatmayacaq. İstisna deyil ki, Həştərxanda Azərbaycan tərəfi narazılığını və ümidlərini Rusiya tərəfinin diqqətinə çatdırsın”.
Politoloq qeyd edib ki, Cənubi Qafqazda yeni əməkdaşlıq mühiti qurulur:
“Qaranlıq qalan məqamlar isə aydınlaşacaq. Hər şey bəzilərinin şərh etdiyi kimi deyil. Vacib məsələlər həllini tapan kimi Cənubi Qafqazdakı yeni proseslərdə qarşılıqlı əməkdaşlığa şahidlik edəcəyik. Türkiyə–Azərbaycan–Rusiya, Azərbaycan–Türkiyə, Azərbaycan–ABŞ, Azərbaycan–İsrail əməkdaşlığı Cənubi Qafqazda Azərbaycanın maraqları ilə üst-üstə düşən məqamlar əsasında müsbət nəticələr verə bilər.
Sonda qeyd edim ki, ikitərəfli dialoq zamanı tərəflər arasındakı mübahisəli məqamlar həll edilə bilər. İstisna deyil ki, bu görüşdən sonra biz liderlər arasında yaxın vaxtlarda birbaşa təmasa da şahidlik edək”.
Turan Rzayev
Globalinfo.az
Hadisənin gedişatını izləmək üçün ain.az saytında ən son yeniliklərə baxın.
