Xalq qazeti portalından əldə olunan məlumata əsasən, ain.az xəbər verir.
ABŞ administrasiyası Ukraynaya ERAM (Extended Range Attack Munition) tipli yeni uzaqmənzilli aviasiya sursatlarının genişmiqyaslı tədarükünü təsdiqləyib. Paket ümumilikdə 3,35 min ədəd bu silahdan ibarətdir və 850 milyon dollarlıq yardım paketinə daxildir. Yardımın əsas maliyyə yükünü Avropa ölkələri üzərinə götürüb. İlk partiyanın isə altı həftə ərzində Ukraynaya çatdırılacağı gözlənilir.
Daha ucuz alternativ
ERAM Britaniya və Fransanın Storm Shadow / SCALP qanadlı raketlərinə nisbətən daha ucuz, lakin oxşar imkanlara malik hibrid silah hesab olunur. O, həm sovet istehsalı, həm də NATO mənşəli təyyarələrə uyğunlaşdırılıb ki, bu da Ukrayna Hərbi Hava Qüvvələri üçün əlavə üstünlükdür.
Layihənin əsas məqsədi böyük məsafələrdə hədəflərin məhv edilməsi üçün kütləvi, universal və sürətli istehsal edilən silah yaratmaq olub. Maraqlıdır ki, texniki tapşırıqda əvvəlcədən “xarici tipli qırıcılarla uyğunluq” şərti qoyulub. Bu isə Ukraynanın MiQ-29 və Su-24 təyyarələrinin əvvəllər Storm Shadow və AGM-88 HARM raketlərinə uyğunlaşdırılması təcrübəsindən fərqli olaraq, vaxt itkisini minimuma endirir.
Texniki xüsusiyyətlər:
Kütləsi: 227 kq
Döyüş başlığı: qəlpəli-fuqas tipli, müxtəlif partlayıcı başlıqlarla təchiz edilə bilir
Uçuş məsafəsi: 240–450 km (daşıyıcının sürət və hündürlüyündən asılı olaraq)
Sürət: 0,6 Max (təqribən 735 km/saat)
Yüksək dəqiqlik: 10 metrədək, GPS siqnallarının pozulduğu şəraitdə belə (inerisial və alternativ naviqasiya hesabına)Ekspertlərin fikrincə, ERAM həm planerləşən JDAM tipli bombaların, həm də kiçik qanadlı raketlərin xüsusiyyətlərini özündə birləşdirən unikal hibriddir.
Ukrayna üçün əhəmiyyəti
Yeni silahın tətbiqi Ukrayna ordusuna arxa cəbhədəki anbar, komanda məntəqəsi və digər strateji hədəflərə zərbə endirmək imkanı verəcək. Eyni zamanda, bahalı Storm Shadow və SCALP raketlərinin çatışmazlığını qismən kompensasiya edə bilər.
Hazırda istehsalçı şirkət illik buraxılışı 1000 ədədədək artırmağı planlaşdırır. Lakin istehsal xəttinin real sürəti barədə məlumat açıqlanmır.
Ekspert rəyləri və proqnozlar
Hərbi ekspertlər bildirirlər ki, ERAM-ın döyüş meydanına çıxması Rusiyanın arxa cəbhə təhlükəsizliyi üçün əlavə risklər yaradacaq. Əvvəllər yalnız Storm Shadow və ATACMS tipli silahlarla məhdud sayda zərbə endirə bilən Ukrayna ordusu, indi daha geniş miqyasda və daha tez-tez uzaqmənzilli hücumlar həyata keçirmək imkanına sahib olacaq.
Eyni zamanda, bu addım Qərbin dəstəyinin davamlılığını göstərir. ABŞ və Avropa, bahalı silahların yerini qismən daha ucuz, kütləvi istehsal edilə bilən variantlarla dolduraraq yardımın uzunmüddətli olmasına şərait yaradır.
Rusiyanın cavab olaraq hava hücumundan müdafiə sistemlərini gücləndirməsi, həmçinin Ukrayna sərhədlərinə yaxın ərazilərdə əlavə ehtiyat qüvvə toplaması ehtimal edilir. Bununla belə, analitiklər hesab edir ki, ERAM-ın döyüşə daxil olması Ukraynanın hücum potensialını əhəmiyyətli dərəcədə artıracaq və 2025-ci ilin payızında cəbhədə aktiv əməliyyatların intensivləşməsinə səbəb ola bilər.
Beləliklə, yaxın aylarda bu yeni silahın tətbiqi həm cəbhədə, həm də diplomatik müstəvidə vəziyyətin gedişinə ciddi təsir göstərəcək.
S.ELAY
XQ
Sonrakı hadisələr barədə daha çox məlumat almaq üçün ain.az saytını izləyin.
