Bakı, 25 avqust, AZƏRTAC
Azərbaycan Prezidenti İlham Əliyevin Türkmənistana işgüzar səfəri iki qardaş ölkə arasında münasibətlərin daha da möhkəmləndirilməsi baxımından mühüm əhəmiyyət daşıyır. Prezidentin Avaza şəhərində səsləndirdiyi “Türkmənistan əmin əllərdədir” fikri isə sadəcə diplomatik kompliment deyil, ölkənin əldə etdiyi sosial-iqtisadi nailiyyətlərə verilən real və səmimi qiymətdir.
Avaza şəhərinə ikinci dəfə səfər etdiyini söyləyən dövlətimizin başçısı bildirdi ki, burada gedən inkişaf, aparılan quruculuq işləri Türkmənistanın etibarlı əllərdə olduğunu aydın şəkildə göstərir. O, xüsusilə vurğuladı ki, Qurbanqulu Məlikquliyeviçin müdrik rəhbərliyi sayəsində təkcə Avaza deyil, bütün digər şəhər və kəndlər sürətlə inkişaf edir, abadlaşır, yeni yaşayış məntəqələri salınır, müasir infrastruktur layihələri gerçəkləşdirilir.
Bu sözləri AZƏRTAC-a açıqlamasında Milli Məclisin deputatı, filologiya elmləri doktoru Elnarə Akimova söyləyib. “Səfər çərçivəsində imzalanan mühüm sənədlər arasında Arxadağ və Füzuli şəhərlərinin qardaşlaşması barədə razılaşma xüsusi rəmzi məna daşıyır. Bu sənəd iki xalqı birləşdirən qədim dostluğun və qardaşlıq münasibətlərinin daha da möhkəmləndirilməsinə xidmət edir. Əsrlər boyu bir ailə kimi yaşayan Azərbaycan və Türkmənistan xalqları bu gün də müstəqil dövlətlər olaraq ortaq ənənələrə sadiqdir və yeni üfüqlərə doğru birlikdə addımlayır.
Prezident İlham Əliyevin çıxışında vurğulandığı kimi, iki ölkə arasındakı münasibətlər təkcə siyasi və iqtisadi tərəfdaşlıqla məhdudlaşmır. Bu, dostluq, gələcək əməkdaşlıq modelidir”, - deyə deputat əlavə edib.
Müsahibimiz bildirib ki, Azərbaycan Prezidenti İlham Əliyevin Türkmənistana işgüzar səfəri regionda qardaşlıq və strateji tərəfdaşlıq prinsiplərinin daha bir parlaq nümunəsinə çevrildi. Prezidentin söylədiyi kimi, Azərbaycan və Türkmənistanın mövqeləri tam üst-üstə düşür, hər iki tərəf gələcək əməkdaşlığa hazırdır və regionun inkişafı üçün ortaq addımlar atmağa sadiqdir. Bu səfər həm iki ölkənin qarşılıqlı münasibətlərinə yeni nəfəs gətirdi, həm də çoxtərəfli əməkdaşlıq imkanlarını genişləndirmək üçün zəruri mühit yaratdı.
Dövlətimizin başçısı qeyd etdi ki, onun dəvəti ilə Qurbanqulu Məlikquliyeviç iyul ayında Azərbaycanda səfərdə olub. Bu səfər zamanı tərəflər iki gün ərzində həm Bakıda, həm də Qarabağ bölgəsində bir sıra mühüm görüşlər keçiriblər. Həmin görüşlər zamanı iqtisadi, siyasi və mədəni sahələrdə qarşılıqlı maraq doğuran məsələlər geniş müzakirə olunub. Prezidentin vurğuladığı əsas məqam odur ki, iki qardaş ölkə bundan sonra da çiyin-çiyinə irəliləyəcək, bütün məsələləri dostluq və qardaşlıq şəraitində həll edəcək. İkitərəfli əməkdaşlıq digər imkanları da genişləndirəcək.
Deputat diqqətə çatdırıb ki, səfər çərçivəsində aparılan müzakirələr və əldə olunan razılaşmalar Azərbaycan ilə Türkmənistan arasında etimadın daha da möhkəmlənməsinə xidmət edir. İki ölkə yalnız siyasi və iqtisadi sahələrdə deyil, həm də mənəvi və mədəni sahədə ortaq dəyərlərə sahibdir. Prezidentin çıxışında vurğulandığı kimi, əsrlər boyu bir-birinə yaxın yaşayan Azərbaycan və Türkmənistan xalqları bu gün də qardaş kimi bir-birinə bağlıdır.
Azərbaycan Prezidentinin səfəri həm də region üçün mühüm mesaj daşıyır. Azərbaycan və Türkmənistan strateji tərəfdaş və qardaş ölkələr kimi, qarşılıqlı hörmət və etimad prinsipləri əsasında, bütün məsələləri sülh yolu ilə həll etməyə sadiqdir. Bu, regionda sabitliyin və inkişafın təmin olunması üçün vacib bir göstəricidir. Həmçinin bu səfər çoxtərəfli əməkdaşlıq formatlarının genişlənməsi üçün əhəmiyyətlidir. Azərbaycan və Türkmənistanın digər qonşu ölkələrlə ortaq layihələr həyata keçirməsi, enerji, nəqliyyat və ticarət sahələrində əməkdaşlığın inkişafı gələcəkdə regionun strateji mövqeyini daha da gücləndirəcək.
Dövlətimizin başçısı çıxışında, həmçinin vurğuladı ki, bu görüşlər çərçivəsində iki ölkənin iqtisadiyyat, ticarət, investisiya və infrastruktur sahələrində əməkdaşlıq imkanları genişləndiriləcək. Bu əməkdaşlıq regionda həm iqtisadi inkişaf, həm də iş yerlərinin yaradılması baxımından böyük əhəmiyyət daşıyır. Xüsusilə enerji və nəqliyyat sektorlarında həyata keçiriləcək ortaq layihələr iki ölkə arasında strateji tərəfdaşlığı daha da dərinləşdirəcək.
“Prezidentin səfəri həm də mədəni və humanitar sahədə əməkdaşlığın gücləndirilməsinə yönəlib. İki ölkə arasında təhsil, mədəniyyət, elm və turizm sahələrində əməkdaşlıq imkanları artırılır, gənclər və tələbələr üçün mübadilə proqramları genişləndirilir. Bu da xalqlar arasında qarşılıqlı anlaşma və dostluğun möhkəmlənməsinə xidmət edir. Səfər zamanı imzalanan sənədlər və razılaşmalar Azərbaycan və Türkmənistanın gələcəkdə birgə layihələr həyata keçirməsi üçün zəmin hazırlayır. Beləliklə, Azərbaycan Prezidenti İlham Əliyevin səfəri Türkmənistanla əməkdaşlığın yeni mərhələsinin başlanğıcı olmaqla yanaşı, regionun inkişafında və xalqlar arasında dostluğun möhkəmlənməsində mühüm rol oynayır. Bu səfər, eyni zamanda, iki ölkə arasında ortaq maraqlar və ortaq layihələrin həyata keçirilməsinin göstəricisi kimi diqqətəlayiqdir. Azərbaycan və Türkmənistan bundan sonra da çiyin-çiyinə addımlayacaq, bütün məsələləri dostluq, qardaşlıq və strateji əməkdaşlıq prinsipləri əsasında həll edəcək”, - deyə E.Akimova fikrini yekunlaşdırıb.
