Bizimyol portalından əldə olunan məlumata əsasən, ain.az xəbər verir.
2025-ci ilin əvvəlindən etibarən Azərbaycan Uşaq Fondu xüsusi həssaslıqla «Sevinc Payı» adlı sosial layihəni həyata keçirir. Layihənin məqsədi valideyn qayğısından məhrum olan uşaqlara sevinc dolu anlar, təbəssüm və bayram əhval-ruhiyyəsi bəxş etməkdir. Hər ayın sonuncu bazar ertəsi xeyirxahlıq qapıları internat məktəblərində, uşaq evlərində və sığınacaqlarda yaşayan balaca fidanlar üçün açılır.
Bizimyol.info Fonda istinadən xəbər verir ki, layihə çərçivəsində uşaqlar maraqlı filmlərlə tanış olur, həmçinin xüsusi hazırlanan menyu və qonaqpərvərliklə qarşılanırlar. Bu anlar onlar üçün sadəcə əyləncə deyil — bu, diqqət və qayğı hissini yaşamaq fürsətidir.
25 avqust tarixində Bakıda keçirilən tədbir bu dəfə xüsusilə “Mələklərimin Arzuları” İB-nin himayəsində olan əlilliyi olan uşaqlara həsr olunmuşdu. Onların səmimi təbəssümləri, parlayan gözləri və xoşbəxt qəhqəhələri göstərir ki, belə anlar nə qədər dəyərlidir. Layihə onların özlərini qiymətli, sevilən və xatırlanan hiss etmələrinə imkan yaradır.
Azərbaycan Uşaq Fondu xüsusilə qayğıya ehtiyacı olanların yanında olmaqla, öz ali missiyasını davam etdirir. «Sevinc Payı» layihəsi xeyirxahlığın və ümidin simvoluna çevrilib.
Daha ətraflı məlumat və yeniliklər üçün ain.az saytını izləyin.
