2024-cü ildə 16 yaşa qədər olan qadınlar tərəfindən dünyaya gətirilən uşaqların sayı 63 olub. Bu barədə məlumat “Azərbaycan gəncləri” adlı statistik məcmuədə yer alıb. Həmin mənbəyə əsasən, yalnız 16 yaşında olan qadınların həyata keçirdiyi doğumların sayı isə 218 nəfər təşkil edib. Rəqəmlər göstərir ki, erkən yaşda baş verən doğum halları hələ də aktual sosial problem olaraq qalır və bu, həm gənc anaların sağlamlığı, həm də dünyaya gələn uşaqların rifahı baxımından diqqət tələb edən mühüm mövzudur
Mütəxəssislərin fikrincə, yetkinlik yaşına çatmamış qızların hamiləliyi ciddi tibbi və sosial risklərlə müşayiət olunur. Onların orqanizmi hələ tam formalaşmadığı üçün hamiləlik və doğuş prosesi həm ana, həm də uşaq üçün ağır nəticələrə səbəb ola bilər. Bundan əlavə, erkən yaşda ana olan qızların təhsil imkanlarının məhdudlaşması, psixoloji təzyiqlərə məruz qalması və gələcək həyat planlarının pozulması da ən çox rast gəlinən problemlər sırasındadır. Dünya Səhiyyə Təşkilatının məlumatına görə, yeniyetmə yaşda hamiləliklər ana ölümünün və uşaq ölümünün əsas səbəblərindən biri hesab olunur
Azərbaycan cəmiyyətində son illər bu məsələ ilə bağlı həm dövlət, həm də qeyri-hökumət təşkilatları tərəfindən maarifləndirmə tədbirlərinə geniş yer verilir. Məktəblərdə və gənclər arasında sağlam həyat tərzi, reproduktiv sağlamlıq və ailə planlaşdırılması ilə bağlı bilgilərin artırılması istiqamətində müxtəlif layihələr həyata keçirilir. Qanunvericilik baxımından isə erkən nikahların qarşısının alınması, uşaqların hüquqlarının müdafiəsi və sosial təminatın gücləndirilməsi kimi addımlar atılır
Bununla belə, statistik göstəricilər onu sübut edir ki, erkən doğum hallarının tamamilə aradan qaldırılması üçün əlavə tədbirlərə ehtiyac var. Bu tədbirlər arasında ailələrin maarifləndirilməsi, qızların təhsildən yayınmamasının təmin olunması, kənd və regionlarda sosial dəstəyin artırılması xüsusi əhəmiyyət daşıyır. Erkən doğumların qarşısının alınması yalnız tibbi deyil, həm də sosial məsələdir və hər bir fərdin gələcəyinə birbaşa təsir göstərir.
