Türkmənistanın Azərbaycanla dostluq və qardaşlıq münasibətləri getdikcə daha da güclənir və bu əməkdaşlıq yalnız siyasi və iqtisadi sahələrlə məhdudlaşmır, eyni zamanda mədəni və dini əlaqələri də əhatə edir. Bu kontekstdə Türkmənistanın Qarabağ bölgəsində məscid inşa edəcəyi ilə bağlı qərar mühüm hadisə kimi qiymətləndirilir. Bu təşəbbüs 2025-ci ilin avqustunda Türkmənbaşı şəhərində keçirilmiş yüksək səviyyəli görüş zamanı Türkmənistan Prezidenti tərəfindən irəli sürülüb və Azərbaycan tərəfindən böyük məmnuniyyətlə qarşılanıb. Türkmənistanın bu addımı yalnız dini inancın dəstəklənməsi baxımından deyil, həm də Qarabağın yenidən qurulması və bərpasına beynəlxalq dəstəyin göstəricisi kimi xüsusi əhəmiyyət daşıyır. Məscidin inşası həm də müsəlman dünyasında birliyin və həmrəyliyin təzahürüdür. Bu layihə çərçivəsində türkmən memarlıq üslubu ilə azərbaycanlı memarların təcrübəsi birləşdirilərək, regionun tarixi və dini irsinə uyğun bir dini kompleks yaradılması planlaşdırılır. Məscidin yerləşəcəyi konkret məkan yaxın zamanlarda Azərbaycan tərəfi ilə razılaşdırılacaq və tikinti işləri mərhələli şəkildə həyata keçiriləcək. Bu təşəbbüs Qarabağda məscidlərin və digər dini abidələrin bərpası prosesinə mühüm töhfə olacaq. Qeyd edək ki, 30 ilə yaxın davam edən işğal dövründə Qarabağ bölgəsindəki dini və mədəni irs ciddi şəkildə dağıdılmış, bir çox məscidlər təhqir olunmuş və yararsız hala salınmışdır. Azərbaycanın işğaldan azad etdiyi torpaqlarda həyata keçirdiyi bərpa-quruculuq işlərinə dost ölkələrin dəstək verməsi isə regionun sürətli inkişafı baxımından xüsusi önəm daşıyır. Türkmənistanın bu addımı isə təkcə bir məscidin tikintisi deyil, həm də sülhə, qardaşlığa və ortaq dəyərlərə verilən dəyərin ifadəsidir. Bu layihə gələcək nəsillər üçün həm dini, həm də mədəni baxımdan əhəmiyyətli bir miras olacaq.

Misir Məmmədov
YAPLaçın rayon təşkilatının fəal üzvü
Prezident yanında Dövlət İdarəçilik Akademiyasının tələbəsi

• Qarabağ
• Məscid
• Türkmənistan
• Inşa