2025-ci il avqustun 8-də ABŞ-ın paytaxtı Vaşinqtonda Azərbaycan Prezidenti İlham Əliyev, Ermənistan Baş naziri Nikol Paşinyan və ABŞ Prezidenti Donald Trampın iştirakı ilə mühüm tarixi sənədlər imzalandı. Bu sənədlər regionda sülhün və sabitliyin təmin olunmasına yönəlmiş addımlar kimi qiymətləndirilir. Ermənistan rəhbərinin Vaşinqtonda sənədləri imzalaması illərdir davam edən münaqişə və gərginliklərin aradan qaldırılması, yeni bir əməkdaşlıq mərhələsinin başlanması baxımından mühüm əhəmiyyət kəsb edir.
Prezident İlham Əliyev sənədlərin imzalanmasını yüksək qiymətləndirərək bildirdi ki, bu razılaşmalar təkcə Ermənistanla Azərbaycan arasında münasibətlərin normallaşdırılmasına deyil, həm də bütövlükdə regionda sabitliyin təmin olunmasına xidmət edəcəkdir. Dövlət başçısı vurğuladı ki, uzun illər davam edən münaqişənin nəticələri aradan qaldırılmalı, Azərbaycan xalqının haqq və ədalətə əsaslanan mövqeyi beynəlxalq səviyyədə tam dəstəklənməlidir. Vaşinqtonda əldə olunan razılaşma isə bu istiqamətdə mühüm mərhələdir.
Əliyevin sözlərinə görə, bu sənədlər regionda yeni əməkdaşlıq imkanları açır. Əvvəla, tərəflər bir-birinin suverenliyini və ərazi bütövlüyünü tanıyır, qarşılıqlı olaraq hərbi gücdən imtina edirlər. Bu isə regionda uzunmüddətli sülhün təmin olunmasının əsas şərtidir. Bundan əlavə, imzalanmış sənədlərdə iqtisadi və nəqliyyat kommunikasiyalarının bərpası xüsusi yer tutur. Bu xüsusda Zəngəzur dəhlizinin açılması barədə razılıq əldə edilməsi həm Azərbaycanın əsas ərazisi ilə Naxçıvan Muxtar Respublikası arasında birbaşa bağlantının təmin olunmasına, həm də beynəlxalq tranzit imkanlarının genişlənməsinə şərait yaradacaq.
Prezident İlham Əliyev Vaşinqtonda baş tutan görüşdə ABŞ-ın vasitəçiliyini də yüksək qiymətləndirdi. Onun sözlərinə görə, ABŞ-ın dəstəyi ilə imzalanan sənədlər beynəlxalq aləmdə Azərbaycanın mövqelərinin güclənməsinə, regionda yeni iqtisadi layihələrin reallaşmasına imkan verəcək. Bu, həm də ABŞ-Azərbaycan münasibətlərində yeni fəsil açır. Enerji, nəqliyyat, təhlükəsizlik, müdafiə sənayesi və süni intellekt sahələrində əməkdaşlığın dərinləşməsi barədə əldə olunan razılıqlar ölkəmizin inkişafı üçün əlavə imkanlar yaradacaq.
Əliyev eyni zamanda ABŞ Konqresində uzun illər qüvvədə olan, Azərbaycanla əməkdaşlığı məhdudlaşdıran 907-ci düzəlişin aradan qaldırılmasını da xüsusi vurğuladı. Dövlət başçısı qeyd etdi ki, bu qərar Azərbaycanın beynəlxalq əməkdaşlıq imkanlarını genişləndirir və tərəfdaşlıq münasibətlərini daha yüksək səviyyəyə qaldırır.
İmzalanan sənədlərin regiondakı ən mühüm nəticələrindən biri də ATƏT-in Minsk Qrupunun fəaliyyətinin rəsmən başa çatması oldu. Bu qurum uzun illər boyu münaqişənin həlli ilə məşğul olsa da, nəticəsiz qalmışdır. Azərbaycan və Ermənistanın birgə müraciəti ilə Minsk Qrupunun fəaliyyəti dayandırıldı və yeni reallıqlara uyğun sülh formatı formalaşdırıldı.
Prezident İlham Əliyevin sözlərinə görə, Vaşinqton görüşü və orada imzalanan razılaşmalar tarixi əhəmiyyət daşıyır. Bu, bir tərəfdən Ermənistanla Azərbaycan arasında münasibətlərin normallaşması üçün mühüm hüquqi zəmin yaradır, digər tərəfdən isə regionda iqtisadi və nəqliyyat əlaqələrinin inkişafına təkan verir. Dövlət başçısı hesab edir ki, bu razılaşmalar gələcək nəsillərə sülh və əməkdaşlıq şəraitində yaşamaq imkanı yaradacaq.
Ermənistan liderinin Vaşinqtonda sənədləri imzalaması sülh prosesinin reallaşmasına, münaqişədən sonrakı dövrün yeni mərhələsinin başlanmasına xidmət edir. Prezident İlham Əliyevin vurğuladığı kimi, artıq qarşıda duran əsas məsələ bu sənədlərin praktiki həyata keçirilməsi və regionda dayanıqlı sülhün tam təmin olunmasıdır. Azərbaycan tərəfi bu istiqamətdə qətiyyətlidir və beynəlxalq tərəfdaşların dəstəyi ilə regionda ədalətli və uzunmüddətli sülhün qurulmasına töhfə verməyə davam edəcəkdir.
Rasim İbrahimov, YAP Masallı rayon təşkilatı, YAP fəalı
