İraq Kəşfiyyat Xidməti rəhbəri Həmid əş-Şatri Suriyanın Prezidenti Əhməd Şaraa ilə sərhəd təhlükəsizliyi, terrorla mübarizə və Suriyadakı iraqlı icması məsələlərini müzakirə edib.
İraqın rəsmi xəbər agentliyi INA-nın məlumatına görə, Şatri paytaxt Dəməşqdə Prezident Şaraa ilə görüş keçirib.
Görüşdə o, İraqın Baş naziri Məhəmməd Şiya əs-Sudanın ikitərəfli münasibətlərin inkişafı və ortaq çətinliklərin aşılması ilə bağlı mesajını Suriya liderinə çatdırıb.
Tərəflər sərhəd təhlükəsizliyi, terrorla mübarizə və Suriyada yaşayan iraqlıların vəziyyətini müzakirə edərək, bölgədə təhlükəsizlik və sabitliyi möhkəmləndirmək üçün təhlükəsizlik əməkdaşlığının gücləndirilməsi barədə razılığa gəliblər.
Qeyd edilir ki, İraq Kəşfiyyat Xidməti rəhbəri Şatri, Suriyada Əsəd rejiminin devrilməsindən sonra Əhməd Şaraa ilə görüşən ilk iraqlı dövlət rəsmisi olub.
