Rusiya Federasiyasının Krasnodar vilayətinin Gelendjik şəhəri yaxınlığındakı Krinitsa kəndi ərazisində pilotsuz təyyarənin qalıqlarının düşməsindən sonra meşədə yanğın baş verib. Yanğın ocaqlarından biri Rusiya lideri Vladimir Putinlə əlaqəli olan "Kolodets" şərab zavodundan bir kilometrdən az bir məsafədə yerləşir.
Hafta.az xəbər verir ki, bu barədə "İnsayder" agentliyinə Krasnodar diyarının qubernatoru Veniamin Kondratyev məlumat çatdırıb. Qeyd olunur ki, yerli hakimiyyət yanğınla bağlı avqustun 28-də səhər saatlarında məlumat alıb.
Avqustun 29-u səhər saatlarına olan məlumata görə, yanğının sahəsi 41,5 hektara çatıb. “Agentlik” xəbər verir ki, Krinitsa kəndi İdokopas burnunda Putinin sarayından cəmi 10 km aralıda yerləşir.
“Vajnıye istoriyi” əlavə edir ki, yanğın yaşayış məntəqəsindən 3-4 km aralıda ola bilər. Krasnodar diyarının qubernatoru bildirib ki, yanğınla 330-dan çox insan mübarizə aparır, 80-ə yaxın texnika, həmçinin Rusiya Fövqəladə Hallar Nazirliyinin helikopteri və təyyarəsi işləyir.
Bildirilir ki, “Putinin sarayı” ilə bağlı filmdə “Kolodets” şərab zavodu “Köhnə Provans” adı ilə xatırlanıb – xüsusən, onun üçün qızıl rəngli italyan tualet fırçaları alınıb. /"Ukrainskaya pravda"/
