Bakı, 29 avqust, AZƏRTAC
“Mirvarid Dilbazi Poeziya Məclisi” İctimai Birliyinin təşəbbüsü və Xətai Rayon İcra Hakimiyyətinin dəstəyi ilə sentyabrın 20-də II Kəlağayı Festivalı təşkil olunacaq.
İctimai Birlikdən AZƏRTAC-a bildirilib ki, tədbir Xətai rayonu, Heydər Əliyev parkında yerləşən amfiteatrda keçiriləcək.
Festival çərçivəsində sərgi tanışlıq olacaq, rəsmi açılış mərasimi keçiriləcək, daha sonra konsert proqramı təqdim ediləcək. Konsertdə dövlət qurumlarının nümayəndələri, tanınmış müğənnilər, aşıqlar və şairlər iştirak edəcəklər.
Sərgidə Güllü Eldar Tomarlının yaratdığı “Kəlağayı ev-muzeyi”nin əsrlərə söykənən 200 qədim kəlağayısı, dekorativ-tətbiqi sənət nümunələri, muzeyin digər zəngin eksponatları, həmçinin kəlağayı haqqında nəşr olunmuş kitablar nümayiş etdiriləcək. Bununla yanaşı, Şəki və Basqal ustalarının hazırladığı kəlağayıların nümayişi və satışı da təşkil olunacaq.
Xatırladaq ki, kəlağayı 2014-cü ildə Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə UNESCO-nun Qeyri-Maddi Mədəni İrs üzrə Reprezentativ Siyahısına daxil edilib və beynəlxalq səviyyədə tanıdılıb. Bu əlamətdar hadisənin 10 illik yubileyi münasibətilə 2024-cü ildə keçirilmiş I Kəlağayı Festivalı Xətai rayonunda başlayıb, sonradan Suraxanı, Yasamal, Naxçıvan Muxtar Respublikası və Sankt-Peterburqda davam etdirilib.
