Sitat.info saytından alınan məlumatlara görə, ain.az xəbər verir.
"Rusiya-Ukrayna müharibəsi ilk gündən ən az Ukraynanın marağına xidmət edirdi. Amerikanın öz maraqları var idi - Rusiyanı zəiflətmək, Avropanı özündən asılı vəziyyətə salmaq... Avropanın maraqları bu idi ki, Rusiya bütün hərbi potensialını, silah- sursatını bu müharibədə itirsin, 10-15 il geri düşsün və təhlükəsizliklə bağlı problemlər azalsın. Rusiyanın marağı bu idi ki, ərazilərini genişləndirsin və Qərbi təzyiq altında saxlasın. Təəssüflə qeyd etməliyik ki, burada ən çox ziyanda olan tərəf Ukrayna oldu".
Bu sözləri Sitat.info-ya açıqlamasında Ağ Partiya başqanı Tural Abbaslı Rusiyanın Kiyevə hücumlarını və Trampın sülh istiqamətində atdığı addımları dəyərləndirərkən deyib.
O bildirib ki, bu ölkə ərazilərini itirdi, insanlarını itirdi və ona vəd edilən köməyi ala bilmədi: "Həm NATO-ya, həm Avropa İttifaqına buraxılmadı. Hətta nə zamansa bu ittifaqlara gələcəkdə daxil olması belə gündəmdə deyil. Hazırda beynəlxalq aləmdə də bilir ki, bu müharibədə zəif bəndin kim olduğu hər kəsə bəllidir. İnanmıram ki, kimsə Putinə müharibəni dayandırmaqla bağlı təzyiq etsin. Əksinə indi Zelenskiyə təzyiq etmək daha asandır. Tramp da həqiqətən Ukrayna tərəfinə daha çox təzyiq edir ki, ərazi mübadiləsinə getsin, atəşkəsə razılaşsın, Krımdan imtina etsin və sair".
T.Abbaslı qeyd edib ki, müharibə nə qədər kəskinləşsə də, Tramp sülh cəhdlərini davam etdirəcək: "O, həm milyarderdir, həm iki dəfə ABŞ prezidenti olub. Onun arzularından biri Nobel sülh mükafatını almaq və öz nəzərində adını tarixə bu şəkildə yazdırmaqdır. Bunun da ən qısa yollarından biri hansı şərtlərlə olursa olsun, Rusiya ilə Ukrayna arasında sülhə nail olmaqdır. Ola bilər ki, müharibə 2, 3 və ya 6 ay uzansın. Ancaq gec-tez Tramp Ukraynanı məcbur edib müharibənin dayanmasına nail olacaq. Hazırda Ağ Ev rəhbəri açıq-aşkar Kiyevi təhdid edir ki, pul verməyəcəm, silah verməyəcəm. Qərb də kömək etmək istəyirsə, silahları öz pulu ilə alsın. Avropalılar da ukraynalıları nə qədər maliyyələşdirəcək, nə qədər silah verəcək, qaçqınları nə qədər yerləşdirəcək -bu bəlli deyil. Çünki Avropa üçün əsas öz maraqlarıdır. Sabah Ukraynanın xərcləri Avropanın maraqlarını aşarsa, təbii ki, onu yarıyolda qoyacaq. Adətən sülh imzalanmamışdan öncə müharibələr daha da kəskinləşir. Çünki hər iki tərəf əlini möhkəmləndirmək istəyir ki, torpaq alsın, hansısa dividentlər qazansın. Ona görə də, Putin məhz strateji nöqtələri vurur ki, danışıqlara üstün tərəf kimi getsin".
Nigar,
Sitat.info
Sonrakı hadisələr barədə daha çox məlumat almaq üçün ain.az saytını izləyin.
