ain.az, GlobalInfo portalından verilən məlumatlara əsaslanaraq xəbər verir.
Ermənistanın Məlumatlı Vətəndaşlar Birliyi təşkilatının sədri Daniel İoannisyanın paylaşımı ictimaiyyətdə birmənalı qarşılanmayıb. İrəvan hökumətinə yaxınlığı ilə bilinən İoannisyan Ararat vilayətində metallurgiya zavodu kimi fəaliyyət göstərən GTB zavodunda əslində artilleriya mərmilərinin istehsal olunduğunu açıqlayıb.
O, zavodun ermənilər üçün vacib rol oynadığını, lakin nə azərbaycanlılar, nə də rusların bundan məmnun olmadığını bildirib. İoannisyanın sözlərinə görə, GTB-nin arxasında müəyyən xarici qüvvələr dayanır və ora mütləq qorunmalıdır. Maraqlıdır ki, bir neçə gün öncə baş nazir Nikol Paşinyan İrəvanın artıq sülh yolu ilə getdiyini və buna görə hərbi xərclərin artırılmayacağını söyləmişdi.
Mövcud sülh danışıqları fonunda bu məlumatın ictimailəşdirilməsi necə dəyərləndirilməlidir? Bakı bu istiqamətdə hansı addımları ata bilər?
Globalinfo.az-a danışan hərbi ekspert Səxavət Məmməd bildirib ki, 8 avqustda Vaşinqtonda baş tutan görüşdən sonra Azərbaycan və Ermənistan yalnız sülh danışıqları çərçivəsində təmas qurur:
“Müharibə və hərbi məsələlər nisbətən arxa plana keçib. Ancaq prosesləri diqqətlə izlədikdə görünür ki, Ermənistan hərbi gücünü artırmaq istiqamətində addımlar atır. Söhbət yalnız artilleriya mərmilərinin istehsalından getmir. Ermənistan Hindistandan anti-dron sistemləri, müxtəlif dronlar, hətta idarəolunan artilleriya mərmilərini də maraqlanır. Faktiki olaraq, ordu quruculuğu prosesini davam etdirirlər.
Həmçinin oxuyun:
Silahları Ermənistanın silahlı qüvvələrindən alırdıq – Mnatsakanyan
GTB zavodu ilə bağlı yayılan məlumat da göstərir ki, Ermənistan silah istehsalını genişləndirməyə qərarlıdır. Bu, Hindistanla birgə həyata keçirilən layihədir. Əvvəllər Ermənistan həmin texnologiyaları Hindistandan alırdısa, indi artıq özü bunun üçün istehsal imkanları yaradır.
Səxavət Məmməd
Hazırda sülh danışıqları gündəmdə olduğu üçün Azərbaycan məsələni rəsmi şəkildə gündəmə gətirmir. Əgər bu, açıq şəkildə müzakirəyə çıxarılarsa, sülh prosesinə zərər vuracağı düşünülür. Hətta nəticədə Paşinyan hakimiyyəti ilə rəsmi Bakı arasında aparılan danışıqlar da dayana bilər. Ona görə bu mərhələdə Azərbaycan sərt reaksiya verməyəcək. Amma proses ciddi şəkildə araşdırılacaq, təhlükə dərəcəsi qiymətləndiriləcək və ehtiyac olarsa, lazımi addımlar atılacaq.
Sülh müqaviləsi ilə bağlı danışıqlar davam etsə də, paralel olaraq digər ehtimallar da nəzarətdə saxlanmalıdır. Prezident İlham Əliyevin “Əl-Ərəbiyyə” telekanalına verdiyi müsahibədə jurnalistin, “Əgər Paşinyan hakimiyyəti dəyişsə, nə baş verə bilər?” sualı konkret şəkildə cavablanmadı. Çünki Ermənistanda hakimiyyət dəyişərsə və yeni rəhbərlik fərqli siyasət yürüdərsə, bu, münasibətlərdə ciddi gərginliklərə səbəb olar”.
Safura Bənnayeva
Globalinfo.az
Hadisənin gedişatını izləmək üçün ain.az saytında ən son yeniliklərə baxın.
