Avqustun 25-də Laçında IX "Muğam” Televiziya Müsabiqəsinin final mərhələsi keçirilib. Bu il 16–30 yaş kateqoriyasında qaliblər Aytac Bəybalayeva, Nərmin Mirzəyeva, Rəis Niftəliyev olub.
Lakin nəticələrin açıqlanmasından sonra ictimaiyyətdə müzakirələr başlayıb. İştirakçılardan Aycan Şükürlü və Kənan Novruzov sosial şəbəkələrdə münsiflərin qərarını qəbul etmədiklərini bildirərək nəticələrin ədalətli olmadığını iddia ediblər.
Narazılıq bildirən ifaçılar müsabiqədə qiymətləndirmə meyarlarının aydın və şəffaf olmadığını qeyd edirlər.
Muğam, UNESCO tərəfindən qeyri-maddi mədəni irs kimi tanınan milli sərvətimizdir. Onun ətrafında yaranan mübahisələr həm bu dəyərlərin nüfuzuna, həm də gələcək nəsil xanəndələrin motivasiyasına təsir edir. Əgər gənclər belə yarışmalarda obyektivlik görməzsə, ya iştirak etməkdən çəkinəcək, ya da sənətə inamını itirəcək, bu isə milli musiqimizin təbliğində ciddi boşluqlar yarada bilər.
IX "Muğam” Televiziya Müsabiqəsinin finalından sonra yaranan narazılıqlar fonunda nəticələrin ləğvi ilə bağlı səsləndirilən fikirlər də gündəmin əsas mövzusuna çevrilib. Münsiflərdən biri olan Mələkxanım Əyyubova Modern.az-a açıqlamasında bildirib ki, iştirakçıların qiymətləndirilməsi tam şəffaf və yan təsirlərdən uzaq olub:
"Biz heç nəyi gizlətməmişik, ballar da, hər şey də ortadadır. O boyda televiziyanı qarşımıza aldıq ki, 7 nəfəri seçək, amma alınmadı. Bu müsabiqədir, şərtlər ortadadır. Biz xalqın gözünün qarşısında böyümüşük, heç vaxt mənfi iş görmərik."
M. Əyyubova onu da qeyd edib ki, hazırda prosesə narazılıq edən şəxslər finala güzəştlə gəliblər: "Kənanı da, Aycanı da güzəştlə finala qədər çıxardıq. Kənan Ağdamda oxuyanda səsi qırıldı, oxuya bilmədi, gərək biz onu həmin vaxt çıxarardıq, amma insafla yanaşdıq. İndi onların etdiyi ayıbdır. Bütün müsabiqə boyu onlara güzəşt etmişik."
Əməkdar mədəniyyət işçisi İlqar Fəhmi bildirib ki, indiyədək bütün müsabiqələrdə kim qalib gəlməyibsə, hamısı narazıdır: "Yaxın günlərdə kino sahəsində də müsabiqə keçirəcəyik, əminəm ki, oradada eyni hal yaşanacaq. Hər kəs hesab edir ki, onun yazdığı ssenari və ya oxuduğu ifa ən yaxşıdır, onun finalda qalib gəlməməyi ədalətsizlikdir. Çünki münsiflər nəticədə kimisə qalib seçəndə o tək həmin gün zil oxumağına baxmır, bütün müsabiqə boyu ifaların keyfiyyəti, stabillik, özünü göstərmək və digər bir çox şərtlərə cavab vermək lazımdır."
O əlavə edib ki, müsabiqə başlayanda SMS ilə qaliblər seçilirdi və burada maddiyyat ön planda çıxırdı, kimin pulu varsa, onlar müxtəlif yollarla səs qazanırdı. Bu səbəbdən səsvermənin strukturu dəyişdirilib.
Müsabiqənin nəticələrinin ləğvi ilə bağlı məsələlərə gəldikdə isə İlqar Fəhmi bildirib ki, ona hələ bu barədə məlumat verilməyib.
IX Muğam Müsabiqəsinin aparıcısı Mümtaz Xəlil isə bildirib ki, Muğam Televiziya Müsabiqəsini digər televiziya yarışmalarından fərqləndirən cəhətlərdən biri məhz SMS səsverməsinin olmamasıdır. "Onun gələcək müsabiqələrdə ləğv olunacağı və ya qalacağı barədə məndə heç bir məlumat yoxdur."
İllərdir keçirilən Muğam Televiziya Müsabiqəsi milli musiqimizin təbliği və yeni istedadların önə çıxmasında əvəzsiz rol oynayır. Bu səbəbdən müsabiqədə ədalət, şəffaflıq və ictimai etimadın qorunması vacibdir. Əks halda, musiqinin incəliklərini təbliğ etmək mümkün olsa da, sənətə olan inamı bərpa etmək çətin olar.
Məsələ ilə bağlı ictimaiyyətə yaxın günlərdə ətraflı məlumat veriləcəyi gözlənilir.
