- Ночной Режим
- Домашняя страница
- Статистика
- Источники
- Рейтинг
- Погода
- Валюта
Masallıda “qız üstündə” dava: Sevgi mübahisəsi cinayətlə bitdi
Demokrat.az-ın əldə etdiyi xəbərə görə, hadisə ötən ilin dekabrın 17-də rayonunun Qarğalıq kəndi ərazisində baş verib.
Masallı rayon sakini, 2003-cü il təvəllüdlü Vüqar Masallı-Xallıcallı avtomobili yolunun Qarğalıq kəndi ərazisindən keçən hissəsində yol kənarında olub. Bu zaman “Mersedes Benz 190” markalı avtomobillə hərəkət edən əvvəllər tanıdığı Elbrus Səfərova əli ilə işarə edib və avtomobili saxlatdırıb.
Bu zaman Vüqar Elbrusa oğlu Röyalla arasında əvvəllər baş vermiş narazılığa görə iradlar bildirib, qəsdən mübahisə və münaqişə yaradıb. O, təpik və daşla zərərçəkmiş şəxsin müxtəlif nahiyyələrinə vurub. Ona müxtəlif dərəcəli bədən xəsarətləri yetirib.
Hadisəni törədən Vüqarın barəsində Cinayət Məcəlləsinin 127.2.3-cü (ümumi təhlükəli üsulla və ya xuliqanlıq niyyəti ilə qəsdən sağlamlığa az ağır zərər vurma) maddəsi ilə ittiham elan edilib.
İş üzrə izahat verən təqsirləndirilən şəxs ona elan olunmuş ittiham üzrə özünü təqsirli bilib. O, ifadəsində göstərib ki, dekabrın 17-də dostu Elvin ilə yolun kənarında, evin qarşısında siqaret çəkib: “Elvin velosipedini sürmək üçün gətirdi. Hazırki hadisədən əvvəl xalam oğlu Fərid ilə Elbrusun oğlu Röyal qız söhbəti üstündə dalaşmışdılar.
Həmin vaxt mən Fəridlə birlikdə getdim. Lakin Röyala xəsarət yetirmədim. Hadisə ilə bağlı 300 manat cərimə olundum”.
Təqsirləndirilən şəxs qeyd edib ki, hadisə günü Elbrus idarə etdiyi avtomobil ilə yoldan keçərkən avtomobili saxlayıb: “Avtomobildən düşərək mənə yaxınlaşdı. Məndən oğlu ilə nə probleminin olduğunu soruşdu. Mən isə oğlu ilə aramızda heç bir problemim olmadığını dedim. Lakin Elbrusa işarə verdim və onun maşınını saxlatdırmamışam. Zərərçəkmiş şəxslə ümumiyyətlə dalaşmaq niyyətim olmayıb. Əvvəl söz ilə mübahisə etmişik. Sonra sözlərimiz bir-birimizə xoş getmədiyindən dalaşmışıq. İlk olaraq zərərçəkmiş mənə kəllə atdı. Mən isə əvvəlcə Elburusun sinə nahiyəsinə əlim ilə vurmuşam, sonra isə üzünə vurmuşam. Ümumilikdə Elbrusu 4-5 dəfə vurmuşam. Həmin vaxt yaxınlıqda olan dostum Elvin bizi ayırdı. Hadisə vaxtı zərərçəkmişin yanında iki nəfər adam olub. Mübahisə nəticəsində onun barmağı sınıb və burnu əzilib. Mənim isə çənəm şişib və əlim sıyrılıb. Mübahisə təxminən 5-6 dəqiqə davam etdi”.
İş üzrə zərərçəkmiş Elbrusun sözlərinə görə, oğlu Röyal Vüqarın toyuna gedib: “Toydan əvvəl oğlumu kənara çəkiblər və həmin yerdə söhbətləri olub. Bu dava məsələsi oradan başlayıb. Mən həmin yerə gedərkən təxminən 5 nəfər adam olub və hamısı məni görən kimi qaçdılar. Orada yalnız Vüqar qaldı. Ona birdə belə hərəkət etməməsini bildirdim və sonra atasına təhvil verdim. Sonra oğlum Vüqarın toyuna getmək üçün evdən icazə aldı. Kənd yeri olduğundan hamı bir-birinin toyunda iştirak edir. Yarım saat keçəndən sonra oğlum əli kəsilmiş vəziyyətdə evə gəldi. Toyda onu döymüşdülər. Elə vəziyyətdə olmuşdu ki, demək olar toyda hamı onu döyüb. Sonra bununla bağlı polisə şikayət etdim. Lakin şəhidin bibisi oğlu gələrək məndən xahiş etdiyindən o, məsələni böyütmədim”.
Zərərçəkmiş şəxsin ifadəsinə görə, hadisə günü avtomobil ilə kəndinə gedərkən Vüqar yolda ona əl edib, idarə etdiyi avtomobili saxladıb: “Həmin vaxt yanımda Namiq və Ramin olub. Vüqarın yanında isə Elvin adlı şəxs olub. Vüqardan oğlumdan nə istədiyini soruşdum. Vüqar isə onun özünün oğlum ilə arasında heç bir problemi olmadığını, lakin oğlumun onunla problemi olduğunu dedi. Ola bilər Vüqar məni başa düşməyib. Ya mən dəliyəm, ya da ki, Vüqar özü dəlidir. Biz sözləşdik, Vüqar ünvanıma nalayiq ifadələr işlətdi. Maşına minib getmək istəyərkən Vüqar arxadan təpik atdı və barmağımı sındırdı. Sonra Vüqar söyüş söyə-söyə kəlləsi ilə vurdu və burnum əzildi. Daha sonra qarşılıqlı dalaşdıq. Ancaq əlim yaralı olduğu üçün çalışdım ki, Vüqar məni vurmasın. Hadisə təxminən 10 dəqiqə davam etdi və Elvin bizi ayırdı. Hadisədən sonra Daxili İşlər Nazirliyinin 102 qaynar xəttinə zəng edərək hadisə barədə məlumat verdim”.
Daha sonra cinayət işi üzrə ifadə verən şahidlərin dediklərindən məlum olub ki, işdə adı keçən Röyalla Fərid eyni qızı seviblər. Buna görə də onların mübahisəsi çəpləşib. Sonda bu olaylar baş verib.
Bu cinayət işinə Masallı Rayon Məhkəməsində baxılıb. Məhkəmənin hökmü ilə Vüqar 1 il 11 ay 26 gün müddətə azadlığın məhdudlaşdırılması cəzası alıb.
Təqsirləndirilən şəxsin üzərinə cəza çəkdiyi müddətdə Masallı rayonunun hüdudlarını tərk etməsi qadağan edilib. Eyni zamanda ona həmin müddət ərzində axşam saat 23:00-dan səhər saat 07:00-dək Masallı rayonu, Qarğalıq kəndində yerləşən fərdi yaşayış evini tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etməsi tapşırılıb.
Habelə cəzanın icrasına nəzarət edən orqanı yaşayış, iş və ya təhsil yerinin dəyişdirilməsi barədə əvvəlcədən məlumatlandırmaq vəzifəsi qoyulub.
Fariz Məlikli
Demokrat.az
