Ermənistanda Xarici İşlər Nazirliyinin əməkdaşının saxlanılması ilə bağlı detallar bəlli olub. 
Yeniavaz.com xəbər verir ki, faktor.am saytının məlumatına görə, XİN-nin saxlanılan əməkdaşı Aşxen Arakelyan azərbaycanlı ilə romantik münasibətdə olub və ona dövlət sirri təşkil edən məlumatları ötürüb.
Nəşr qeyd edib ki, Arakelyan dindirmə zamanı Azərbaycan tərəfdən pul aldığını etiraf edib.
Ölkənin İstintaq Komitəsi də Aşxen Arakelyanın saxlanması ilə bağlı məlumat yayıb:
“İyunun 20-də Milli Təhlükəsizlik Xidmətindən daxil olan məlumat əsasında Cinayət Məcəlləsinin 418-ci maddəsinin 1-ci hissəsi və 424-cü maddəsinin 1-ci hissəsi ilə nəzərdə tutulmuş cinayətlər əsasında cinayət işi başlanıb. Buna səbəb XİN əməkdaşının casusluq yolu ilə xarici nümayəndənin dövlət sirri olan məlumatlarla tanış olmasına şərait yaradıb, habelə düşmənçilik fəaliyyətinin həyata keçirilməsinə kömək etməsi olub”.
Qeyd edilib ki, ibtidai istintaq zamanı cinayətdə digər şəxslərin, o cümlədən XİN-in əməkdaşlarının iştirakı, adıçəkilən işçiyə dəstək və ya köməklik göstərilməsinə dair hər hansı məlumat əldə edilməyib. Odur ki, adıçəkilən əməkdaşın təkbaşına hərəkət etməməsi ilə bağlı mətbuatda yayılan məlumatlar həqiqətə uyğun deyil.
Kütləvi informasiya vasitələrində yayılan məlumatları təkzib edərək o da qeyd edilib ki, bu şəxs yüksək vəzifəli şəxs olmayıb və Ermənistanın xaricdəki konsulu vəzifəsini tutmayıb.

***11:11
Avstriyadakı Ermənistan konsulu Aşken Aleksanyan Ermənistana qayıdarkən Azərbaycanın xeyrinə casusluqda şübhəli bilinərək saxlanılıb.
Yeniavaz.com xəbər verir ki, bu barədə “Hraparak” məlumat yayıb.
“Bundan dərhal sonra Ermənistan Respublikasının Milli Təhlükəsizlik Xidmətinin əməkdaşları bütün günü Xarici İşlər Nazirliyinin binasında axtarış aparıblar. Onlar kompüterləri yoxlayıb, sənədləri araşdırıblar. Sonda həbsin ictimaiyyətə açıqlanmaması qərara alınıb, çünki iş böyük qalmaqala çevrilə bilərdi”, - qəzet yazır.