1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Təxminən 1400 kvadratmil sahəsi olan dünyanın ən böyük aysberqi "A23a" Antarktika okeanında üzməyə davam edir və elm adamlarının ciddi narahatlığına səbəb olur.
Oxu.Az xəbər verir ki, bu barədə "Unilad" nəşri məlumat yayıb.
Ölçüsünə görə Los-Anceleslə müqayisə edilən və kosmosdan görünən nəhəng buz kütləsi sürətlənmiş ərimə əlamətləri göstərir. Onun səthində buzun sürətlə əridiyini göstərən su hovuzları əmələ gəlib.
Avstraliya Milli Universitetinin tədqiqatçıları xəbərdarlıq edirlər ki, "A23a"nın əriməsi prosesi gələcək nəsillər üçün fəlakətli nəticələrə səbəb ola bilər. Xüsusilə, pinqvinlər və suitilər qidalanma yerlərini itirə bilərlər ki, bu da onların çoxalmasına və sağ qalmasına təhlükə yaradacaq.
Mütəxəssislər aysberqin sonrakı davranışının okean axınlarından asılı olduğunu vurğulayırlar. Bununla belə, artıq aydındır ki, "A23a"nın əriməsi Antarktidada genişmiqyaslı dəyişikliklərə səbəb olacaq və bu dəyişikliklər qlobal iqlim sisteminə uzunmüddətli təsir göstərəcək.
