Vətəninfo.az xəbər verir ki, ABŞ prezidenti Tramp Hindistandan idxal olunan məhsullara 50%-lik rüsum tətbiq etsə də, Narendra Modi Moskva ilə tərəfdaşlığı davam etdirməkdə qərarlıdır.
Financial Times yazır ki, Hindistanın baş naziri Narendra Modi Çin Xalq Respublikasında keçirilən Şanxay Əməkdaşlıq Təşkilatının (ŞƏT) sammiti çərçivəsində Vladimir Putin ilə görüşündə, ABŞ-ın tarif təzyiqlərinə baxmayaraq, Yeni Dehli ilə Moskva arasında enerji sahəsində əməkdaşlığın genişlənməsini alqışlayıb.
Modi görüş zamanı bildirib:
“Ən çətin şəraitdə belə Hindistan və Rusiya birlikdə, yan-yana addımlayıblar. Bizim sıx əməkdaşlığımız təkcə ölkələrimiz üçün deyil, həm də qlobal sülh, sabitlik və firavanlıq üçün vacibdir”.
Hindistan Xarici İşlər Nazirliyinin məlumatına görə, tərəflər iqtisadiyyat, maliyyə və enerji sektorlarında əməkdaşlığın inkişafını müzakirə edib və bu sahədə ikitərəfli münasibətlərin dinamik inkişafından məmnunluqlarını ifadə ediblər.
Kremlin mətbuat katibi Dmitri Peskov görüş barədə bildirib ki, Putin və Modinin təkbətək söhbəti Rusiya liderinin limuzinində bir saat davam edib, daha sonra nümayəndə heyətləri arasında danışıqlar keçirilib. Bu, 2025-ci ildə onların ilk şəxsi görüşü olub.
Xatırladaq ki, keçən həftə ABŞ prezidenti Donald Tramp, Rusiyadan ucuz neft aldığı üçün Hindistandan idxal olunan məhsulların əksəriyyətinə 50%-lik tarif tətbiq etdiyini açıqlayıb.
ABŞ administrasiyası bu addımı, Hindistanın Ukrayna müharibəsindən sonra Rusiya neftinin əsas alıcısına çevrilməsi ilə izah edib.
Hindistan hökumətinin məlumatına əsasən:
2022-ci ildən sonra Hindistan təxminən 140 milyard dollar dəyərində Rusiya nefti idxal edib;
Bu neft əsasən benzin və dizelə emal olunaraq, həm daxili, həm də beynəlxalq bazarlarda satılıb.
Qərb ölkələri, o cümlədən ABŞ, bu ticarətə müəyyən qədər göz yumub, çünki bu, qlobal enerji qiymətlərini sabit saxlamağa yardım edib. Bu münasibət yalnız Hindistanın aldığı neftin qiyməti G7 tərəfindən müəyyən edilmiş yuxarı həddi keçmədiyi müddətə qədər davam edib.
Financial Times qeyd edir ki, Trampın tarif təhdidindən sonra, Modi və Putin iki dəfə telefonla danışıb. Həmçinin Hindistanın xarici işlər naziri Subrahmanyam Cayşankar və milli təhlükəsizlik müşaviri Ajit Doval Moskvaya səfər edərək Putinlə görüşüblər.
Rusiya prezidentinin bu ilin sonuna kimi Hindistana səfəri də planlaşdırılır.
Gateway House beyin mərkəzinin enerji üzrə baş tədqiqatçısı Amit Bhandari məsələ ilə bağlı bildirib:
“Aydındır ki, Rusiya nefti Hindistan üçün qalıcıdır. Neftin olduğu yer Rusiyadır”.
Nəşr həmçinin qeyd edir ki, Rusiya Hindistanın əsas silah tədarükçüsü olaraq qalır və bu, strateji əməkdaşlığı daha da möhkəmləndirir.
