Suriya dövlət xəbər agentliyi “SANA” xəbər verir ki, Suriya bazar ertəsi günü 14 ildə ilk dəfə rəsmi olaraq neft ixrac edib və ticarət şirkəti ilə razılaşma əsasında Tartus limanından 600 min barel xam neft göndərilib.
Suriyanın Energetika Nazirliyinin nümayəndəsi Riyad əl-Cubasi bildirib ki, alıcı “B Serve Energy” beynəlxalq ticarət şirkəti olub. Neftin ilk partiyası “Nissos Christiana” tankerində daşınır. Suriya rəsmisinin sözlərinə görə, çatdırılma nəqliyyat şəbəkələrinin, neft anbarlarının və liman infrastrukturunun işləkliyini müəyyən etməyə kömək edəcək.
Suriya Neft Nəqliyyat Şirkətinin baş direktoru Maan Paşa qeyd edib ki, hazırkı ixrac həcmi ölkənin daxili tələbatını üstələyir. Onun sözlərinə görə, tankerə Suriyanın bir neçə yatağında hasil edilən neft, həmçinin Baniyas və Homsdakı zavodlarda xammal emal edildikdən sonra qalan artıqlıqlar yüklənib. Şirkət rəhbəri konkret sahələrin adını çəkməyib. Suriyanın neft ehtiyatlarının böyük hissəsi ölkənin şimal-şərqində, kürdlərin nəzarəti altında olan ərazilərdə yerləşir.
2011-ci ildə vətəndaş müharibəsi başlamazdan əvvəl Suriya gündə təxminən 380 min barel neft ixrac edirdi. Bununla belə, illərdir davam edən münaqişələr ölkənin enerji infrastrukturunu məhv edib və beynəlxalq sanksiyalar neft və qaz ticarətini çətinləşdirib.
İyun ayında ABŞ prezidenti Donald Tramp Suriyaya qarşı sanksiyaları ləğv edən fərman imzalayıb. Bunun ardınca bir neçə ABŞ şirkəti ölkədə karbohidrogenlərin kəşfiyyatı və hasilatı üçün hazırlaşmağa başladı. Bundan əlavə, Suriyanın yeni hökuməti və Əmirliyin logistika operatoru “DP World” arasında Tartus limanında çoxfunksiyalı terminalın istismarı üçün 800 milyon dollarlıq müqavilə imzalanıb. Prezident Bəşər Əsəd dövründə limanı Rusiyanın “STG Engineering” şirkəti idarə edirdi.
Almaz Həsənli
