BAKI, 8 sentyabr. TELEQRAF
Avrozonada inflyasiya 2025-ci ildə 2%-ə, 2026-cı ildə isə 1,6%-ə enəcək, 2027-ci ildə isə yenidən 2%-ə qayıdacaq.
Teleqraf xəbər verir ki, bu barədə Avropa Mərkəzi Bankının (AMB) 2025-ci ilin iyunu üzrə proqnozunda qeyd olunub.
Eyni zamanda, enerji inflyasiyasının 2026-cı ilin sonunadək mənfi qalacağı, 2027-ci ildə isə iqlim dəyişikliyi ilə bağlı fiskal tədbirlər səbəbindən artacağı gözlənilir.
2025-ci ildə Avropanın yarısında inflyasiya artacaq
Mövcud statistikası olan 30 Avropa ölkəsinin təxminən yarısında 2025-ci ilin sonunadək inflyasiyanın 2024-cü illə müqayisədə yüksələcəyi proqnozlaşdırılır. Lakin bəzi ölkələrdə dəyişiklik cəmi 0,3 faiz bəndi və ya daha az olacaq.
İqtisadi Əməkdaşlıq və İnkişaf Təşkilatının (OECD) hesabatına görə, ən kəskin artım Litvada gözlənilir – 0,9%-dən 4%-ə, ardınca Latviyada – 1,4%-dən 3,6-ə. Litvada bu artım əsasən ərzaq və enerji qiymətlərinin yüksəlməsi ilə, Latviyada isə əmək çatışmazlığı fonunda yüksək maaş artımı və ərzaq qiymətlərinin bahalaşması ilə izah olunur.
İnflyasiyanın artımı Bolqarıstanda 1,4 faiz bəndi, Macarıstanda isə 1,2 faiz bəndi olacaq. İtaliya, Finlandiya və İrlandiyada da göstəricinin 0,8 faiz bəndindən çox artacağı proqnozlaşdırılır.
2024-2025-ci illər arasında Türkiyədə inflyasiyanın 27,1 faiz bəndi azalaraq 58,5%-dən 31,4%-ə enəcəyi proqnozlaşdırılır. Buna baxmayaraq, ölkə Avropada ən yüksək göstəriciyə sahib olacaq. İkinci ən yüksək inflyasiya isə Macarıstanda gözlənilir - 4,9%.
Türkiyədən başqa, ən böyük azalmalar İslandiyada (-2,4 faiz bəndi), İsveçdə (-1,5 faiz bəndi) və Belçikada (-1,4 faiz bəndi) qeydə alınacaq.
Ən iri iqtisadiyyatlar: Fransada inflyasiya ən aşağı, Birləşmiş Krallıqda ən yüksək olacaq
2025-ci ildə Avropanın beş ən böyük iqtisadiyyatı arasında ən yüksək inflyasiya səviyyəsi Birləşmiş Krallıqda (3,1%) olacaq. Bu artım minimum əməkhaqqının, sosial sığorta ödənişlərinin və kommunal xərclərin yüksəlməsi ilə izah olunur.
Fransada isə elektrik tariflərinin azaldılması hesabına ən aşağı inflyasiya (1,2%) gözlənilir. ABŞ idxalına tətbiq edilən tariflərin isə məhdud təsiri olacaq, çünki Fransanın ABŞ bazarına çıxışı nisbətən zəifdir.
2026-cı ildə də böyük beşlik arasında ən aşağı inflyasiya Fransada - 1,66%, ən yüksək isə Birləşmiş Krallıqda - 2,28% proqnozlaşdırılır. İtaliyada inflyasiya 1,88%, İspaniyada 1,91%, Almaniyada isə 2,13% təşkil edəcək.
2025-2026-cı illərdə inflyasiya proqnozu
2026-cı ildə Avropanın əksər ölkələrində inflyasiyanın 2025-ci illə müqayisədə azalacağı gözlənilir. Cəmi beş ölkədə artım proqnozlaşdırılır. Ən böyük artım İsveçdə olacaq - 1,3%-dən 2,0%-ə (0,7 faiz bəndi). Ardınca Fransa gəlir - 1,2%-dən 1,7%-ə (0,5 faiz bəndi). Buna baxmayaraq, Fransa yenə də ən aşağı inflyasiya göstəricisinə malik ölkələrdən biri olacaq.
Türkiyə (-12,9 faiz bəndi) istisna olmaqla, ən böyük azalmalar Estoniya, Xorvatiya və Litvada gözlənilir - hər birində 1,5 faiz bəndindən çox. Əsas iqtisadiyyatlarda isə Birləşmiş Krallıqda inflyasiya 0,8 faiz bəndi, İspaniyada isə 0,5 faiz bəndi azalacaq.
2026-cı ildə 27 ölkədə inflyasiya 2,8%-dən aşağı qalacaq
OECD-nin məlumatına görə, Türkiyə (18,5%) istisna olmaqla, 2026-cı ildə Avropanın heç bir ölkəsində inflyasiya 3,7%-i keçməyəcək. Göstəricilər İsveçrədə 0,6%-dən Macarıstanda 3,6%-dək dəyişəcək, Rumıniyada isə 3,4% təşkil edəcək. Qalan 27 ölkədə inflyasiya 2,8%-dən aşağı qalacaq.
İsveçrədən sonra 1,7% ilə Fransa ikinci ən aşağı göstəriciyə sahib olacaq. Bir çox ölkədə inflyasiya 1,7%-2,7% intervalında cəmləşəcək.
