Diplomatik mənbələr bildirir ki, Islamabadın addımı Avrasiya İqtisadi İttifaqına qoşulmaq prosesini sürətləndirə bilər...
Pakistan Ermənistanı BMT-də üzv dövlət kimi tanımağı planlaşdırır və bunun qarşılığında Avrasiya İqtisadi İttifaqına (Aİİ) qoşulmaq üçün konsensus əldə etməyi hədəfləyir.
Poliqon xəbər verir ki, bu barədə TASS Agentliyinə diplomatlar məlumat veriblər.
Agentliyin bir mənbəsi qeyd edib ki, bu addım reallaşarsa, Pakistan Aİİ ilə üzvlük prosesi üçün lazımi dəstəyi alacaq. Başqa bir diplomatik mənbə isə bildirib ki, prosedurlar bir neçə həftədən bir neçə aya qədər davam edə bilər və bu perspektiv artıq nəzərə çarpan səviyyədədir. Mənbə həmçinin vurğulayıb ki, Ermənistan və Azərbaycan arasında imzalanmış sülh sazişi bu prosesi heç bir maneə olmadan həyata keçirməyə imkan verir.
Xatırladaq ki, 31 avqust tarixində Ermənistanın xarici işlər naziri Ararat Mirzoyan və Pakistanın xarici işlər naziri İshaq Dar Şanxay Əməkdaşlıq Təşkilatının Çin sammiti çərçivəsində görüş keçirərək diplomatik əlaqələrin qurulmasına dair birgə kommunike imzalayıblar.
Ermənistan müstəqilliyini elan etdikdən sonra Pakistanla diplomatik əlaqələr qurmayıb, çünki Islamabad Qarabağ münaqişəsi ilə bağlı müəyyən mövqe sərgiləyib. Uzun illər ərzində Ermənistanın milli təhlükəsizlik doktrinasında Pakistan milli təhlükəsizlik üçün təhlükə kimi göstərilib.
8 avqustda isə Vaşinqtonda Ermənistan və Azərbaycan xarici işlər nazirləri sülh sazişini paraflayaraq bölgədə sülhün bərqərar olduğunu elan ediblər.
Poliqon.info
