Finss.az xəbər verir ki, İngiltərənin "Tottenhem Hotspur" futbol klubu böyük investorlardan komandanın alınması ilə bağlı iki təklifi rədd edib.
Klubun sahibləri Nyukasl Yunayted-in keçmiş həmsahibi Amanda Stavelinin PCP International Finance investisiya fondundan, həmçinin Rocer Kennedi və Vinq-Fai Nq başçılıq etdiyi bir qrup investordan təkliflər alıb və “qətiyyətlə rədd ediblər”. "Tottenhem" ENIC Sports & Developments Holdings Ltd vasitəsilə britaniyalı iş adamı Co Lyuisə məxsusdur. Klubun sədri Daniel Levi bu yaxınlarda 25 il tutduğu vəzifədən istefa verib.
"Klubun idarə heyəti və ENIC təsdiqləyir ki, "Tottenhem Hotspur" satılmır və ENIC klubda pay almaq üçün hər hansı təklifi qəbul etmək niyyətində deyil", - məlumatda deyilir.
“Tottenhem” ötən mövsüm İngiltərə Premyer Liqasını 17-ci pillədə başa vurub, komanda isə Avropa Liqasının qalibi olub.
