Fransa Milli Assambleyasının sol qanad partiyası olan “Müxalif Fransa” (LFI) parlamentdə prezident Emmanuel Makronun impeçmentinə başlanılması üçün layihə təqdim edib. Vətəninfo.az xəbər verir ki, bu təşəbbüs, Fransanın Konstitusiyasının 68-ci maddəsinə əsaslanır. LFI-nin layihəsini 85 deputat imzalayıb.
Deputatlar Makronu “öz mandatı ilə tamamilə zidd olan hərəkətlərə görə” məsuliyyətə cəlb etmək məqsədilə parlamenti yığmağa çağırıblar. Onlar, prezidentin Fransa iqtisadiyyatında, sosial sahələrdə və ekologiyada böhran yaratdığını, hətta ölkəni “bənzərsiz bir sosial, iqtisadi, ekoloji və institusional böhrana sürüklədiyini” iddia edirlər.
LFI, Makronu həmçinin 2024-cü ildə keçirilən erkən parlament seçkilərindən sonra xalqın iradəsinə qarşı hərəkət etməklə, öz mövqeyini qorumaq üçün azlıqda olan siyasi qüvvələri vəzifələrə təyin etməkdə ittiham edir.
LFI-nin lideri Matilda Pano, “Makron xalqın səsverməsinin nəticələrini qəbul etməyib, buna görə də onu işdən çıxarmalıyıq”, — deyə bildirib.
