TBİLİSİ, 10 sentyabr. TELEQRAF
Gürcüstanın “İmedi” telekanalının sifarişi əsasında “Gorbi” şirkətinin ölkədə yerli seçkilər öncəsi keçirdiyi rəy sorğusunun nəticələri açıqlanıb.
Teleqraf-ın yerli bürosu xəbər verir ki, respondentlərin 65,9%- seçkilərdə hakim “Gürcü Arzusu” partiyasını dəstəkləyəcəyini bildirib.
Rəyi soruşulanların 10,7%-i “Gürcüstan naminə Qaxariya”, 10,4%-i “Lelo”, 5,1%-i “Girçi”, 4,2%i isə “Vətənpərvərlər alyansı” partiyasına səs verəcəklərini söyləyiblər.
“Gorbi” şirkətinin bu ilin iyun ayında apardığı sorğunun nəticələri ilə müqayisədə “Gürcü Arzusu”nun reytinqi yüksəlib. Öncəki sorğuda hakim partiyanı dəstəkləyənlərin göstəricisi 56,2% təşkil edib.
Sorğuda iştirak edənlərin 77,6%-i Tbilisi meri vəzifəsinə “Gürcü Arzusu”nun namizədi Kaxa Kaladzeyə dəstək ifadə edib.
Qeyd edək ki, sorğu üzbəüz müsahibə üsulu ilə avqustun 11-dən 20-dək aparılıb. Ümumilikdə 2 300 nəfərin rəyi soruşulub.
Xatırladaq ki, Gürcüstanda yerli seçkilər oktyabrın 4-də keçiriləcək.
