Qadağa çimərliklər, dayanacaqlar, kafe və restoranların terraslarını əhatə edəcək...
Poliqon xəbər verir ki, İspaniya hökuməti açıq havada ictimai yerlərdə siqaret çəkməyə qadağa qoyulmasını nəzərdə tutan yeni qanun layihəsi hazırlayıb. Layihəyə əsasən, qadağa çimərliklərdə, avtobus dayanacaqlarında, stadionlarda, eləcə də bar və restoranların terraslarında tətbiq olunacaq. Qadağa yalnız tütün məhsullarını deyil, həmçinin veyp və digər elektron siqaret cihazlarını da əhatə edəcək.
Reuters yazır ki, yeni təşəbbüs iyul ayında Fransada qəbul edilən oxşar məhdudiyyətləri xatırladır. Lakin fərqli olaraq, Fransada qadağa bar və restoranların terraslarına, həmçinin elektron siqaretlərə şamil edilmir. İspaniyada isə bu sahədə daha sərt yanaşma tətbiq olunacaq.
Qonaqpərvərlik sektoru artıq layihəni tənqid edib. Onların sözlərinə görə, açıq hava terrasları xüsusilə siqaret çəkənlər arasında böyük populyarlığa malikdir və bu addım müəssisələrin müştəri axınına mənfi təsir göstərə bilər.
İspaniya Səhiyyə Nazirliyinin məlumatına əsasən, ölkədə hər il siqaretlə bağlı səbəblərdən 50 mindən çox insan həyatını itirir. Bu, gündə orta hesabla 137 ölüm halı deməkdir.
Oxşar mövzu Rusiyada da gündəmdədir. Dövlət Dumasında payız sessiyasında veyplərin tam qadağan edilməsini nəzərdə tutan qanun layihəsinin müzakirəsi planlaşdırılır. Avqustun 22-də isə Nijni Novqorod vilayətinin qubernatoru Qleb Nikitin prezident Vladimir Putinə regionlara veyplərin tam qadağası səlahiyyəti verilməsini təklif edib. Putin bu təşəbbüsü dəstəkləyib.
Poliqon.info
