ABŞ Konqresmeni Co Vilson Rusiyayla ticarətin dayandırılması məqsədilə "Cekson-Venik düzəlişinin” bərpası haqqında qanun layihəsi təqdim edib.
Hurriyyet.az xəbər verir ki, o, bu barədə X-də paylaşım edib.
"Polşaya hücumdan sonra mənə bu qanun layihəsini təqdim etmək imkanı verildiyi üçün minnətdaram. Layihə Rusiyaya qarşı "Cekson-Venik düzəlişinin” yenidən qüvvəyə minməsini və bu terrorçu diktatura ilə istənilən ticarətin dayandırılmasını nəzərdə tutur”, – deyə Vilson vurğulayıb.
Konqresmenin sözlərinə görə, keçmiş prezident Barak Obama və ABŞ-ın dövlət katibi Con Kerri bu qanunu "səhvən” ləğv ediblər. Onun fikrincə, ABŞ-ın "təhlükəli yenidənqurma siyasəti” məhz bu addımla başlanıb və bu da "hərbi cinayətkar Putin”i Krımı işğal etməyə sövq edib. "Tramp bu vəziyyəti düzəldəcək!” – deyə Vilson əlavə edib.
Qeyd edək ki, "Cekson-Venik düzəlişi” 1974-cü ildə qəbul edilmiş ABŞ qanunudur. Bu qanun, vətəndaşlarını ölkədən buraxmayan (məsələn, SSRİ-dən yəhudilərin çıxışına icazə verilməməsi hallarında) və "pis iqtisadiyyata malik” ölkələrlə normal ticarəti qadağan edirdi.
SSRİ dağıldıqdan sonra da qanun Rusiyaya qarşı qüvvədə qaldı, lakin ABŞ prezidentləri hər il onu "donduraraq” ölkə ilə ticarəti davam etdirirdilər. 2012-ci ildə isə qanun ləğv edildi və onun əvəzinə "Maqnitski Aktı” qəbul olundu (Rusiya rəsmilərinə qarşı fərdi sanksiyalar nəzərdə tutan qanun).
Bundan əvvəl ABŞ senatoru Lindsi Qrem Polşaya hücumdan sonra Konqresin Rusiyaya qarşı daha sərt sanksiyaları dəstəkləməyə hazır olduğunu bəyan etmişdi. Onun sözlərinə görə, amerikalıların məqsədi müttəfiqlərə artan təhlükəyə qarşı çıxmaq imkanı verməkdir.
"Avropaya: Ümid edirəm ki, siz anlayırsınız – Konqresdə respublikaçılar və demokratlar prezident Tramp ilə birlikdə yeni ideyalar üzərində işləyirlər. Məsələn, rüsumlar qoymaq kimi tədbirlər müharibəyə son qoymaq üçün nəzərdə tutulur. Ümid edirəm ki, siz bunu izləyirsiniz”, – deyə Qrem vurğulayıb.
Həmçinin Tramp Polşaya qarşı Rusiya "Şahed” dronlarının hücumuna reaksiya verib. O, bu insidenti özünün Truth Social sosial şəbəkəsində şərh edib:
"Bu, Polşanın hava məkanının Rusiya dronları tərəfindən pozulmasıdır? Başladı!” – deyə Tramp qeyd edib.
