Rusiya prezidenti Vladimir Putin ölkəni üç eyni bunker vasitəsilə idarə edir. Bu, onun yerini həm məmurlardan, həm də kəşfiyyat orqanlarından gizlətməyə imkan verir.
Bu barədə “The Wall Street Journal” məlumat yayıb.
Nəşrin məlumatına görə, Putin Rusiyanı ölkənin müxtəlif bölgələrində yerləşən üç eyni konfrans zalından idarə edir. Bütün ofislər vahid plana uyğun tikilib və ən xırda detallarına qədər eyni təchizatla təmin olunub.
Hətta kabinetlərdəki laklı masanın üstündəki qoşa başlı qartal olan qələm tutacağı və on ədəd iti karandaşın düzülüşü hər üç otaqda eynidir. Pəncərələrin olmaması isə dövlət başçısının yerini xarici müşahidəçilərin müəyyən etməsini mümkünsüz edir.
Putin mobil telefonlardan istifadə etmir və nadir hallarda internetə çıxır. O, xüsusi mobil stend üzərində düz monitorlardan istifadə edərək videobağlantı vasitəsilə görüşlər keçirir. Ofislərdəki kompüterlər isə şəbəkədən ayrılıb və ya ciddi şəkildə təcrid olunub.
Prezidentin Kommunikasiya İdarəsinin mühəndisləri onun zənglərinin şifrələnməsini təmin edən xüsusi rabitə rejimini idarə edirlər.
Məhz bu bunkerlər vasitəsilə Putin müharibə zamanı ölkəni idarə edir, Ukraynadakı cəbhə xəttindəki komandirlərə əmrlər verir və Rusiyanın daxili məhdudiyyətlərinə nəzarət edir.
Videokonfranslar zamanı ekranda görünən rəsmilər çox vaxt Prezidentin zənginin ölkənin 11 saat qurşağından hansından gəldiyini bilmirlər.
“The Wall Street Journal” yazır ki, heyət bəzən Putinin başqa şəhərə köçdüyünü elan edir, hava limanına boş kortej və təyyarə göndərir, daha sonra isə o, videokonfransda görünərək başqa yerdə olduğu illüziyası yaradır.
Musavat.com
