Əmək müqaviləsi işçi ilə işəgötürən arasında münasibətləri tənzimləyən əsas hüquqi sənəddir. Müqavilə vasitəsilə işçinin hüquq və vəzifələri, əməkhaqqı, iş vaxtı, istirahət və digər şərtlər rəsmiləşdirilir. Son illərdə bu prosesin elektronlaşdırılması həm vaxt və resurs qənaəti, həm də şəffaflıq baxımından mühüm yenilik hesab olunur.
Əmək Hüquqları Müdafiə Liqasının sədri Sahib Məmmədov bu barədə Musavat.com-a bildirib ki, əmək müqavilələrinin onlayn imzalanması mütərəqqi addımdır, lakin bəzi risklərin mövcudluğunu istisna deyil. Onun sözlərinə görə, bu addım həm işçi, həm də işəgötürən üçün ciddi üstünlüklər yaradır:
“İşəgötürən elektron müqaviləni formalaşdırır və işçiyə təqdim edir. İşçi onu sistemə daxil olaraq təsdiqləyir və istədiyi vaxt çıxarış götürə bilir. İşəgötürən müqaviləni işçinin iradəsinə zidd olaraq dəyişdirə bilmir. Bundan əlavə, kağız kargüzarlığından azad olunur, vaxt və resursa qənaət edilir. Ən əsası, işçi müqaviləni imzalamaq üçün idarəyə getməyə ehtiyac duymur, istənilən yerdən elektron imza ilə təsdiq edə bilir”.
S. Məmmədov həmçinin bu prosesin müəyyən risklər daşıdığını da qeyd edib: “Bəzən işçilərin smartfonu, öz adına telefon nömrəsi və ya elektron imzadan istifadə bacarığı olmur. Bu halda işəgötürənlər onların əvəzinə müqaviləni təsdiqləyirlər. Məsələn, işçi elektron imzasını mühasibatlığa və ya kadrlar şöbəsinə verir, onlar da onun adından təsdiqləyirlər. Bu isə işçinin hüquqlarının pozulması ehtimalını artırır və arzuolunan hal deyil”.
Sədrin sözlərinə görə, bütün müsbət tərəflərə baxmayaraq, bu sahədə işçilərin maarifləndirilməsi və texniki imkanlarının artırılması vacibdir.
Sultan Məmmədli
Musavat.com
