Braziliya rəhbərliyi Federal Ali Məhkəmənin Braziliyanın keçmiş prezidenti Jair Bolsonaroya qarşı 27 illik həbs cəzasından sonra ABŞ-ın mümkün sanksiyalarından narahat deyil. Vətəninfo.az xəbər verir ki, bunu ölkə prezidenti Luiz İnasio Lula da Silva deyib.
“Heç bir narahatçılıq yoxdur. Qorxmuram”, – Lula da Silva yerli “Band” telekanalına müsahibəsində deyib. “Bir ölkənin prezidenti digər suveren dövlətin qərarlarına qarışa bilməz. O, hansısa addım atmaq qərarına gəlsə belə, bu, onun öz problemi olacaq”.
Lula da Silva onu da vurğulayıb ki, Bolsonaronun 2023-cü ilin yanvarında hazırkı dövlət başçısının vəzifəyə başlamasının qarşısını almaq üçün həqiqətən də dövlət çevrilişi təşkil etmək niyyətində olduğuna şübhə yoxdur.
“Keçmiş prezident bütün səlahiyyət müddəti ərzində (demokratik) institutları nüfuzdan salıb”, o qeyd edib.
Braziliya lideri, həmçinin Braziliya Konqresinin federal deputatı və keçmiş prezidentin oğlu Eduardo Bolsonaronun ABŞ rəhbərliyini Braziliyaya qarşı sanksiyalar tətbiq etməyə çağırdığı üçün hərəkətlərini pisləyib.
Daha əvvəl Bolsonaroya dəstək ifadə edən və Braziliyaya 50% tariflər tətbiq edən ABŞ prezidenti Donald Tramp qərarın “Braziliya üçün çox pis olduğunu” deyib.
ABŞ dövlət katibi Marko Rubio Bolsonaronun məhkum edilməsini “cadugər ovu” adlandırıb və ABŞ-ın “lazımi cavab verəcəyini” vəd edib.
